UNEC-də “Science Slam” modelində dəyirmi masa keçirilib

03 APREL 2017 | VIEWS:
2902

UNEC Tələbə Elmi Cəmiyyəti (TEC) və “Maliyyə və maliyyə institutları” kafedrasının Tələbə Elmi Dərnəyinin birgə təşkilatçılığı ilə “Science Slam” modelində dəyirmi masa keçirilib.

Maliyyə və mühasibatlıq fakültəsinin aktiv tələbələrinin iştirakı ilə keçirilən tədbir “Milli iqtisadiyyatın inkişaf istiqamətləri və prinsipləri” mövzusunda olub.

Fakültə üzrə TEC-in elmi rəhbəri, dosent Nigar Tağıyeva tələbələrə elmi fəaliyyətlə məşğul olmanın üstünlüklərindən danışıb, onlara tövsiyələrini verib.

UNEC TEC-in elmi rəhbəri, dosent Emin Qəribli və UNEC TEC sədri Əvəzağa Məlikov “Science Slam” layihəsi barədə ətraflı məlumat verib. Bildirib ki, elmin populyarlaşdırılmasına, xüsusən tələbələr arasında elmi fəaliyyətin stimullaşdırılmasına xidmət edən layihə ölkədə ilk dəfə olaraq UNEC-də reallaşdırılıb. Layihənin şərtlərinə uyğun olaraq, universitetlərdə  məruzəçilərin elmi tədqiqatları dinlənilir. Layihənin önəmi ondan ibarətdir ki, dinləmələr yalnız qeyri-rəsmi şəraitdə, musiqi və vizual görüntülərin müşayiətilə aparılır. İzləyicilər bəyəndikləri tədqiqat işini alqışlayır, daha çox alqış qazanan tədqiqatçılar isə qalib hesab edilir.

Konfrans zamanı tələbələr müxtəlif mövzuda hazırladıqları təqdimatlarla çıxış ediblər. Tələbələrdən Səidə Xəlil, Aygün Abbasova və Rüfanə Süleymanovanın çıxışı xüsusilə fərqlənib.

Tədbir müzakirələrlə davam edib.

2903 3