Türkiyə Respublikasının Universitetləri və Azərbaycan Dövlət İqtisad Universiteti (UNEC) arasında imzalanan proqram protokolları əsasında həyata keçirilən “Mevlana Mübadilə Proqramı” çərçivəsində 2015/2016-cı tədris ilində professor-müəllim və tələbə mübadiləsi üçün nəticələr elan edilib.
Bu il UNEC-dən 25 tələbə proqram çərçivəsində Türkiyənin nüfuzlu ali təhsil müəssisələrində – İstanbul Universiteti, Süleyman Demirel Universiteti, Anadolu Universiteti, Yildiz Teknik Universiteti, Gazi Universiteti, Mersin Universiteti, Beykent Universiteti, Akdeniz Universiteti, Çukurova Universiteti, Düzce Universiteti, Sakarya Universiteti və Erciyez Universitetində təhsil almaq imkanı qazanıb. Tələbələrdən bəzisi bir neçə universitet tərəfindən seçilib.
Eyni zamanda bu proqramda iştirak üçün müraciət edən səkkiz müəllim uğurlu nəticə göstərərək mübadilə proqramında təcrübə keçmək üçün İstanbul Universiteti, Gazi Universiteti, Anadolu Universiteti, Sakarya Universiteti və On Dokuz Mayıs Universitetindən dəvət alıb.
Müəllim və tələbələrin proqramda iştirakı ilə bağlı bütün xərclər YÖK (Yüksek Öğretim Kurulu Başkanlığı) tərəfindən ödəniləcək.
Proqramı uğurla başa vuran müəllim və tələbələrə sonda “Mevlana Mübadilə Proqramının” Sertifikatları təqdim ediləcək. Tələbələrin əldə etdikləri kreditlər UNEC tərəfindən müvafiq qaydada tanınacaq.