Azərbaycan Respublikasının Kosmik Agentliyinin (Azərkosmos) Yerin müşahidəsi üzrə müsabiqəsi keçiriləcək. Müsabiqənin keçirilməsində əsas məqsədi peyk məlumatlarının ölkə daxilində istifadəsini təşviq etmək, Azərbaycanda Yer səthinin məsafədən müşahidəsi sahəsini daha da genişləndirmək və bu sahə üzrə ictimaiyyət arasında maarifləndirməni artırmaqdan ibarətdir.
2024-cü ilin ölkəmizdə “Yaşıl dünya naminə həmrəylik ili” elan edilməsi çərçivəsində müsabiqənin cari il üçün mövzusu iqlim dəyişikliyi və onunla mübarizədə kosmik həllərin tətbiqinə həsr olunur.
Sözügedən müsabiqədə iştirak etmək üçün ilk növbədə 31 may 2024-cü il tarixinədək https://azercosmos.az/en saytında yerləşdirilmiş iştirak formasını dolduraraq, peyk təsvirləri vasitəsilə həyata keçirilməsi nəzərdə tutulan elmi araşdırma və ya tədqiqatın qısa məzmununu təqdim etmək lazımdır.
Müsabiqə üçün təqdim olunan layihələrin əsas müəllifi qismində yalnız 18-35 yaş aralığında olan gənclər iştirak edə bilər. Layihənin həmmüəlliflərinə yaş məhdudiyyəti qoyulmur. Qeyd edək ki, ilk üç yeri tutan iştirakçı pul mükafatı ilə təltif olunacaqdır.
Əlavə məlumat almaq üçün [email protected] e-poçt ünvanı vasitəsilə əlaqə saxlaya bilərsiniz.