UNEC-də “Dil bacarıqları və iqtisadi fürsətlər: Tələbələrin dünya bazarı üçün hazırlanması” adlı III Beynəlxalq Forum keçiriləcək
Mayın 30-da Azərbaycan Dövlət İqtisad Universitetinin (UNEC) 95 illik yubileyinə həsr olunmuş “Language Proficiency and Economic Opportunity: Preparing Students for a Globalized Market” mövzusunda III Beynəlxalq Forum keçiriləcək.
Ənənəvi olaraq hər il təşkil olunan beynəlxalq tədbirin əsas məqsədi xarici dillərin tədris keyfiyyətinin artırılması, UNEC tələbələrinin dil bacarıqlarının inkişaf etdirilməsi və onların qlobal əmək bazarının tələblərinə uyğun hazırlanmasıdır.
Forum çərçivəsində yerli və beynəlxalq ekspertlərin iştirakı ilə azərbaycan, ingilis və çin dillərində 25 interaktiv vorkşop keçiriləcək.
Müzakirələr zamanı qloballaşma dövründə çin dilinin artan rolu, tədris metodlarının təkmilləşdirilməsi, ingilis dili qiymətləndirməsində ESP (English for Specific Purposes) yanaşmasının sektorlar üzrə tətbiqi, dil tədrisinin real kommunikasiya bacarıqları ilə uyğunlaşdırılması, eləcə də dil qiymətləndirməsində qlobal standartlarla milli reallıqların balanslaşdırılması kimi mövzular diqqət mərkəzində olacaq.