DISKURS.AZ virtual iqtisadi forumuna qeydiyyat davam edir
Azərbaycan Dövlət İqtisad Universitetinin (UNEC) yeni layihəsi – iqtisadçı alimlərin və praktiklərin “DISKURS.AZ“ virtual iqtisadi forumuna qeydiyyat davam edir.
Diskurs.az virtual iqtisadi forumunun məqsədi ən aktual iqtisadi məsələlərin müzakirəsini təşkil etmək üçün Azərbaycanın, və eləcə də tanınmış xarici iqtisadçıların bir araya gələ biləcəkləri məkanın yaradılmasıdır. Virtual forum həmçinin, maraq kəsb edən məsələlərə dair materialları həm yerləşdirməyə, həm də onları qiymətləndirməyə və şərhlər əlavə etməyə imkan verir.
Forumda iqtisadi proseslərin ekspert icmalı, müxtəlif iqtisadi məsələlərə aid müvafiq mütəxəssislərin rəy və təklifləri yer alacaq. Eyni zamanda istifadəçilərə öz maraq dairələrinə uyğun əlavə bölmələr yaratmaq imkanı veriləcəkdir.
İstifadəçilər Azərbaycanda elə bir unikal “intellektual meydança”nın iştirakçılarına çevriləcəklər ki, orada iqtisadiyyatın və biznesin aktual məsələlərini ölkənin aparıcı iqtisadçı alimləri və müxtəlif sahələrin mütəxəssisləri ilə birbaşa müzakirə edə biləcəklər.
Forum debatlar aparmağa imkan yaradan bir platforma rolunu da oynayır. Burada mutəxəssislər müxtəlif iqtisadi məsələlərə dair müzakirələr apararaq müştərək təkliflər formalaşdıra biləcəklər. Debatlara müxtəlif iqtisadi məktəblər, habelə müstəqil ekspertlər də dəvətlidir.
Elektron forum həmçinin iqtisadçılar ilə daimi əks əlaqə üçün vasitə rolunu oynayacaq və saytın istifadəçiləri arasında istər Azərbaycanın, istərsə də xarici ölkələrin vətəndaşları arasında müxtəlif mövzulara aid sorğular keçirməyə imkan verəcək.
Layihə eyni zamanda müəyyən tədris elementi də özündə daşıyır. Belə ki, tələbələrimiz müzakirələri izləmək və onlardan faydalanmaq imkanını əldə edirlər.
İqtisadçıların forumda iki formada iştirakı nəzərdə tutulmuşdur.
Birinci – qısa məqalələr forması, ikinci – suallar və mövzulara dair debatlar formasıdır.
Sayt istifadəçilərə kifayyət qədər geniş çeşidləmə imkanları verir. Yəni, bütün qeydiyyatdan keçmiş istidafəçilərin siyahısına bir səhifədə baxmaq, onlar haqqında məlumatlarla tanış olmaq, onların yazı və məqalələrini, forumda olan hər hansı bir kateqoriyaya aid bütün məqalələri, mövcud debat qruplarını bir səhifədə görmək olur.
Forumda iştirak qeydiyyat əsasındadır. Qeydiyyatdan keçməyən istifadəçilər yalnız materiallarla tanış ola bilərlər. Sayt onların müzakirələrə qoşulmasını məhdudlaşdırır. Forumun ümumi idarəetməsi moderator tərəfindən həyata keçirilir.
Sayt üç – azərbaycan, rus, ingilis dillərində fəaliyyət göstərəcək. Forumun istənilən materialını sosial şəbəkələrdə paylaşmaq mümkündür.
Azərbaycan Dövlət İqtisad Universitetinin yeni “UNEC Ekspert” jurnalı Diskurs.az virtual iqtisadi forumunda yerləşdiriləcəkdir.
Saytda qeydiyyatdan keçmək üçün təlimat-videosunu izləyə bilərsiniz: