ADİU-da əlilliyi olan şəxslər üçün mərkəz yaradılır
Azərbaycan Respublikasının Təhsil Nazirliyi və Əmək və Əhalinin Sosial Müdafiəsi Nazirliyinin dəstəyi ilə Azərbaycan Dövlət İqtisad Universitetində (ADİU) əlilliyi olan şəxslər üçün mərkəz yaradılır.
Layihənin təqdimatında ADİU-nun professor-müəllim heyətinə bildirilib ki, mərkəzin məqsədi Avropa təcrübəsinin ölkə ali təhsil müəssisələrində tətbiq edilməsidir. Layihənin yerli tərəfdaşları Təhsil Nazirliyi, Əmək və Əhalinin Sosial Müdafiəsi Nazirliyi, Azərbaycan Dövlət İqtisad Universiteti, Xəzər Universiteti, Gəncə Dövlət Universiteti, Sumqayıt Dövlət Universiteti, Lənkəran Dövlət Universiteti, Əlil Təşkilatları İttifaqıdır. Avropa Tərəfdaşları isə İnsan hüquqları üzrə Avropa Məsləhət Şurası (Hollandiya), Lodz Universiteti (Polşa), Makedoniya Universiteti (Yunanıstan Respublikası), Karl Franzens Qraz Universitetidir (Avstriya).
Gözdən Əlillər Cəmiyyətinin vitse-prezidenti Bəybala İbadullayev mövzunun sosial əhəmiyyətindən, mövcud problemlərdən, imkanlardan söz açaraq, sözügedən mərkəzin vacibliyini vurğulayıb.