UNEC-in “Keyfiyyət elçiləri” monitorinqlərə başladı
Fevralın 22-də Azərbaycan Dövlət İqtisad Universitetinin (UNEC) “Özünüqiymətləndirmə və Keyfiyyətin Yüksəldilməsi” şurası tərkibində fəaliyyət göstərən “Keyfiyyət elçiləri” tədris prosesinin ilk monitorinqinə start veriblər. Monitorinqlər universitetdə tədrisin keyfiyyətinin yüksəldilməsi, tədrisin təşkili prosesində mövcud problemlərin müəyyən edilməsi və bu prosesin daha səmərəli təşkili məqsədilə aparılıb.
“Keyfiyyət elçiləri” Maliyyə və mühasibat fakultəsinin mühazirə dərslərində iştirak ediblər. Tədrisin sillabuslarda və təqvim-tematik planlarda qeyd edilən mövzulara uyğun təşkilini, fənnlər üzrə işci tədris proqramının (sillabus) müasir tələblərə uyğun olaraq hazırlanması və tələbələrə təqdim edilməsi vəziyyəti, müəllimlərin EDUMAN sistemindən istifadə səviyyəsi-şəxsi kabinet, elektron jurnal, eləcə də tələbələrin mühazirə mətnləri, interaktiv tədris vəsaitləri ilə təminatı ilə bağlı müşahidələr aparıblar.
Monitorinqlər təsdiq edilən kriteryalar üzrə semestr ərzində fakultənin bütün kurslarında aparılacaq.