ADİU-da 2015-ci ilin ilk rübünün yekunlarına həsr olunan tədbir keçirilib
Mayın 7-də Azərbaycan Dövlət İqtisad Universitetində (ADİU) 2015-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan tədbir keçirilib.
Tədbiri giriş sözü ilə açan ADİU-nun rektoru, professor Ədalət Muradov Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2015-ci ilin I rübünün sosial-iqtisadi inkişafın yekunlarına həsr olunmuş iclası barədə ətraflı məlumat verib.
Tədbirdə iştirak edən Azərbaycan Respublikası Nazirlər Kabineti Aparatının İqtisadiyyat şöbəsinin rəhbəri Şahin Sadıqov birinci rübdə iqtisadi sahələr üzrə əldə olunan nəticələr barədə məlumat çatdırıb. Ayrı-ayrı sektorlar üzrə yatırılan sərmayə həcminin dinamikasından danışılıb. Ş.Sadıqov rüb ərzində neft, tikinti və xidmət sektorlarında iqtisadi inkişaf göstəricilərində nəzərə çarpacaq irəliləyişlərin olduğunu qeyd edib. Qeyri-neft sənayesində davamlı inkişaf təmin olunarsa, prioritet istiqamətlərdə məqsədlərə çatmaq mümkün olacağı vurğulanıb. Məruzəçi çıxışı zamanı kənd təsərrüfatı sektorundakı vəziyyətə də toxunub. O bildirib ki, sözü gedən sahədə əlavə dəyər qabiliyyətini artırmaqla həm məşğulluq, həm də məhsuldarlıq artırmaq mümkün olacaq. Bütün iqtisadi göstəricilərə nəzər saldıqda I rübün nəticələrini uğurlu olduğu vurğulanıb.
Tədbirin ikinci hissəsində müəllim və professor heyəti ilə interaktiv müzakirələr zamanı son qlobal iqtisadi proseslərin ölkə büdcəsinə təsiri, milli pul vahidinin dayanıqlığı, ixracın inkişaf trayektoriyasından danışılıb.
ADİU-nun rektoru, professor Ədalət Muradov yekunda bildirib ki, ilk rübün iqtisadi yekunları onu deməyə əsas verir ki, dünya iqtisadiyyatında baş verən böhranlı proseslərə baxmayaraq, ölkə iqtisadiyyatı uğurla inkişafdadır.