ADİU-da Ulu Öndər Heydər Əliyevin anadan olmasının 92-ci ildönümünə həsr olunan silsilə tədbirlər davam edir
Azərbaycan Dövlət İqtisad Universitetində (ADİU) Ulu Öndər Heydər Əliyevin anadan olmasının 92-ci ildönümünə həsr olunan silsilə tədbirlər davam edir.
Mayın 8-də Beynəlxalq İqtisadi Münasibətlər fakültəsində “Azərbaycan müasir geoiqtisadi proseslər kontekstində” mövzusunda açıq mühazirə keçirilib. Fakültə dekanı Mənsur Bərxudarov geoiqtisadi proseslərdə iştirakçıların maraq və davranışlarının xarakteri haqqında elmi fikirlər irəli sürüb. Müasir geoiqtisadi proseslərin xüsusiyyətlərini nəzərə alaraq Azərbaycanın geoiqtisadi aktivliyini konkret faktlar və dəlillərlə əsaslandırıb. Bildirib ki, ölkənin iqtisadi inkişaf yolunun təməlində Ulu Öndər Heydər Əliyevin bizə miras qoyduğu model dayanır.
Açıq mühazirə diskusiya ilə davam edib.
Politologiya kafedrasında isə “Heydər Əliyev və Azərbaycanda dövlət quruluşu” mövzusunda konfrans keçirilib. Kafedra müdiri, professor Zahid Məmmədov tələbələrə Ulu Öndərin keçdiyi şərəfli həyat yolundan danışıb.
Tələbələrdən Vüqar Həziyev “Heydər Əliyev Azərbaycançılıq ideologiyasının banisidir”, Hicran Səfərova “Heydər Əliyev yeni inkişaf strategiyası böyük yolun davamı” və Ulduz Məmmədova “Heydər Əliyev Yolu və milli ideologiya modeli” mövzularında elmi məruzə ilə çıxış ediblər.
Biznes inzibatçılığı fakültəsində isə Ulu Öndərin xatirəsinə həsr olunan açıq dərs keçirilib. Tələbələrin məruzəsi dinlənildikdən sonra, Ümummilli Liderin həyat və fəaliyyətini əks etdirən film nümayiş etdirilib.