ADİU-da ümumrespublika üzrə ilk “Azərbaycan Əmək Yarmarkası” layihəsinin təqdimatı keçirilib
Aprelin 2-də Azərbaycan Respublikasının Təhsil Nazirliyi, Azərbaycanda Amerika Ticarət Palatası (“AmCham Azerbaijan”) və “Britiş Amerikan Tobakko” şirkətinin nümayəndələri Azərbaycan Dövlət İqtisad Universitetinin tələbələri ilə görüş keçirib. Görüşdə bildirilib ki, mayın 23-də Azərbaycan Respublikasının Təhsil Nazirliyi, Azərbaycanda Amerika Ticarət Palatası (“AmCham Azerbaijan”) və “Britiş Amerikan Tobakko” şirkətinin birgə təşkilatçılığı ilə Heydər Əliyev Mərkəzində tələbələr üçün əmək yarmarkası keçiriləcək.
British American Tobacco şirkətinin Qafqaz reqionunda əməkdaşlıq və tənzimləmə işləri üzrə direktoru Zviad Skvitaridze bildirib ki, Təhsil Nazirliyinin təşəbbüsü ilə təşkil olunan əmək yarmarkası Azərbaycanda ilk dəfə keçiriləcək. Yarmarkada Azərbaycanda fəaliyyət göstərən 100-dən artıq beynəlxalq və yerli şirkətin iştirakı nəzərdə tutulub. Onlar yarmarkaya 300-dən çox vakansiya haqqında məlumatla qatılacaqlar.
Azərbaycanda Amerika Ticarət Palatası (“AmCham Azerbaijan”) şırkətinin üzvlərlə iş üzrə mütəxəssisi Zamira Abbasova əmək yarmarkasında III-IV kurs bakalavriat, eyni zamanda magistratura səviyyəsində təhsil alan tələbələrə yarmarka işəgötürənləri tərəfindən iş imkanlarını araşdırmağa əlverişli şərait yaradılacağını haqda məlumat verib. O, qeyd edib ki, əmək yarmarkası Azərbaycanın müxtəlif universitetlərində təhsil alan tələbələrin beynəlxalq və yerli şirkətlərdə təcrübəyə cəlb edilməsinə, həmçinin onların işlə təmin olunma imkanlarının genişləndirilməsinə yönəlmiş tədbirlər çərçivəsində keçirilir.
Əmək yarmarkası çərçivəsində işəgötürənlərlə tələbələr arasında tədbirdən əvvəl əlaqələr yaradılacaq, müəssisə təmsilçiləri namizədlər haqqında ətraflı məlumatlandırılacaq və tədbir günü müvafiq şirkət nümayəndələri ilə görüşlər təyin olunacaq. İlk dəfə yaradılan bu imkanlardan bəhrələnmək üçün tələbələr xüsusi proqram təminatı vasitəsilə şəxsi məlumatlarını daxil etməklə qeydiyyatdan keçəcəklər. Bundan sonra şirkətlər müvafiq namizədləri yarmarka zamanı nəzərdə tutulan vaxtlarda müsahibəyə dəvət edəcəklər.
Sonda tələbələri maraqlandıran suallar cavablandırılıb.
Qeyd: Tədbirdə iştirak etmək istəyən tələbələr www.jobfair.az internet saytına daxil olmaqla qeydiyyatdan keçə bilərlər. Son qeydiyyat tarixi may ayının 1-nə kimidir.