ADİU əməkdaşları “Ümid yeri” uşaq sığınacağında olublar
YAP Səbail rayon Qadınlar Təşkilatının üzvləri, Azərbaycan Dövlət İqtisad Universitetinin Həmkarlar İttifaqının sədri, universitetin Tələbələrlə iş üzrə prorektoru və ADİU Qadınlar Şurasının fəalları “Ümid yeri” uşaq sığınacağında uşaqlarla görüşüb. Görüşdə ADİU-nun dosenti, YAP Səbail rayon Qadınlar Təşkilatının sədri Təranə Kərimova valideyn himayəsindən məhrum olan uşaqlara dövlət qayğısından danışıb, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, millət vəkili Mehriban xanım Əliyevanın uşaq evlərinə göstərdiyi diqqət və qayğı haqqında ətraflı məlumat verib. Bildirib ki, Heydər Əliyev Fondunun kimsəsiz, valideyn himayəsindən məhrum, fiziki imkanları məhdud, habelə Ermənistanın Azərbaycana hərbi təcavüzü nəticəsində məcburi köçkün həyatı yaşayan uşaqlara göstərdiyi diqqət hamımız üçün layiqli örnəkdir. Onları ziyarət etmək hər birimizin vətəndaşlıq borcudur.
ADİU-nun Tələbələrlə iş üzrə prorektoru Səadət Qəndilova uşaqların təhsil problemləri ilə maraqlanıb və öz tövsiyələrini verib. S.Qəndilova bildirib ki, onların qayğı və problemlərinin operativ həlli istiqamətində dövlətimiz tərəfindən ardıcıl olaraq zəruri tədbirlər görülür.
Sonra ziyarətçilər uşaqların çəkdikləri rəsmlərə və əl işlərindən ibarət sərgiyə baxıblar, onların hazırladıqları şeir və musiqiləri dinləyblər.
Görüşün sonunda uşaqlara hədiyyələr təqdim edilib.