Yerli İstehsalat və İstehsal Texnologiyaları Sərgisi keçiriləcək
7-9 dekabr tarixlərində ölkəmizdə ilk dəfə olaraq, “1-ci Yerli İstehsalat və İstehsal Texnologiyaları” sərgisi keçiriləcək.
Kiçik və Orta Biznesin İnkişafı Agentliyi və “Marsol Group”un təşkilatçılığı, “Arenol Group”un baş sponsorluğu ilə Bakı İdman Sarayında təşkil olunacaq sərginin məqsədi yerli məhsulların istehsal potensialının artırılmasını, ixracyönümlü sahələrin daha da inkişaf etdirilməsini, eləcə də müasir istehsal avadanlıqları və texnologiyalarının tanıdılmasını təmin etmək, istehsal texnologiyaları barədə ictimaiyyəti məlumatlandırmaq və yerli məhsulların ixracı sahəsində əməkdaşlığı genişləndirməkdir.
Dekabrın 9-dək davam edəcək sərgidə 100-ə yaxın şirkət tərəfindən istehsal edilən məhsul və istehsal texnologiyaları ictimaiyyətə təqdim olunacaq. Ziyarətçilər yerli istehsalçıların məhsullarını da əldə edə biləcəklər.
Sərgidə iştirak etmək ödənişsizdir. İştirak etmək üçün marsolexpo.az saytından və ya sərgi günü məkanda qeydiyyatdan keçmək mümkündür.