Oktyabrın 6-da Azərbaycan Dövlət İqtisad Universitetinin (UNEC) rektoru, professor Ədalət Muradov yeni tədris ilində tələbələrlə ilk qəbulunu keçirib. Görüş zamanı tələbələrin fikirləri dinlənilib, təşəbbüsləri müzakirə edilib.
Tələbə-rektor Cavanşir Əsədov, “İqtisadçı Gənclər Akademiyası”nın sədri Hidayət Kərimov və “İqtisadçı Tələbələrə Dəstək” İB-nin sədri Səməd Rzazadə birgə layihələrini rektora təqdim ediblər. Təkliflər arasında universitetdaxili intellektual yarışların təşkili və ” UNEC 1-ci Tələbə İdman Oyunları”nın keçirilməsi daha çox marağa səbəb olub. Tələbə təşkilatlarının rəhbərlərinin təşəbbüsləri rektor tərəfindən müsbət qarşılanıb və icrası üçün müvafiq tapşırıqlar verilib. UNEC-in 4-cü kurs tələbəsi Nadir Xəlilovun “Yaşıl İqtisad” layihəsi də dəyərləndirilərək, təkmilləşdirilməsi istiqamətində tövsiyələr verilib.
Rektor bildirib ki, universitet həyatının intellektual və səmərəli təşkili üçün tələbələrə bundan sonra da hər bir dəstək veriləcək.
Qeyd: UNEC-də “Açıq qapı” günü hər ayın birinci şənbə günü keçirilir. Rektor hər həftənin çərşənbə axşamı (13:30 – 14:30) tələbə və valideynlərlə, cümə axşamı (14:00 – 16:00) əməkdaşlarla qəbul keçirir.