UNEC-də Ali Təhsildə Keyfiyyət Təminatı Standartları ilə əlaqədar növbəti təlim keçirilib
Oktyabrın12-də Azərbaycan Dövlət İqtisad Universitetində (UNEC) Avropa İttifaqının maliyyə dəstəyi ilə “Bolonya prosesi və keyfiyyət təminatı üzrə Avropa standartları və təlimatları” mövzusunda təlimlərin 2-ci mərhələsi təşkil olunub.
Təlimlər “Ali təhsil sisteminin Avropa ali təhsil məkanının tələblərinə daha da uyğunlaşdırılması məqsədilə Azərbaycan Respublikasının Təhsil Nazirliyinə dəstək göstərilməsi” adlı tvinninq layihəsi çərçivəsində həyata keçirilib. Təlim iştirakçıları ali təhsil müəssisələrində keyfiyyət təminatının təşkili ilə bağlı ətraflı məlumatlandırılıblar.
Azərbaycanın Avropa təhsil məkanına uğurlu inteqrasiyası və ali təhsil sistemində həyata keçirilən islahatlara yardım göstərilməsi məqsədilə təhsil proqramları, onların hazırlanması, tələbələr, tədris və təlim resursları, dəstək xidmətləri ilə əlaqədar standartlar müzakirə edilib.
Təlimdə Azərbaycanın ali təhsil müəssisələrinin keyfiyyət şöbələrinin ekspertləri ilə yanaşı, Finlandiya və Estoniyalı ekspertlər də iştirak ediblər.
Sonda iştirakçılara sertifikat təqdim edilib.
Qeyd: İki il müddəti olan TVİNNİNQ layihəsinin fəaliyyət planı keyfiyyətin artırılması üzrə Boloniya prosesinə uyğun olaraq ali təhsil sahəsində islahatların aparılması, ali təhsil müəssisələri üçün akkreditasiya sisteminin təkmilləşdirilməsi, Avropa İttifaqı və Azərbaycan arasında siyasi dialoq və getdikcə artmaqda olan beynəlxalq əməkdaşlıq və mobillik məsələlərini əhatə edir.