UNEC-də Azərbaycanlıların Soyqırımı Gününə həsr olunan tədbir keçirilib
YAP Səbail rayon təşkilatının İstiqlaliyyət 6 ünvanında yerləşən ərazi partiya təşkilatı və UNEC Dizayn Məktəbinin birgə təşkilatçılığı ilə Heydər Əliyev və 31 Mart – Azərbaycanlıların Soyqırımı Gününə həsr olunan tədbir keçirilib.
Tədbirin açılışında Ulu Öndər Heydər Əliyevin və şəhidlərin əziz xatirəsi ehtiramla yad edilib.
Sonra Soyqırımı Gününə həsr edilən videoçarx nümayiş olunub.
“İstiqlaliyyət 6” ünvanı üzrə ərazi partiya təşkilatının sədri, inzibati və təşkilati məsələlər üzrə prorektor dosent Şaiq Əsgərov tədbirin açılışında çıxış edərək, erməni silahlı dəstələrinin azərbaycanlılara qarşı törətdikləri qırğının xalqımızın tarixinə qanlı hərflərlə yazıldığını, erməni qəsbkarlarının vətənimizə və xalqımıza qarşı məkrli addımlar atdığını diqqətə çatdırıb. O, Ümummilli lider Heydər Əliyevin 1998-ci il martın 26-da imzaladığı “Azərbaycanlıların soyqırımı haqqında” Fərmanla ilk dəfə olaraq, dövlət səviyyəsində bu qətliama siyasi qiymət verildiyini, bu siyasi kursun Prezident İlham Əliyev tərəfindən uğurla davam etdirdiyini bildirib.
Sonra UNEC Dizayn Məktəbinin dosenti Yeganə Ağamalıyeva “31 mart – Azərbaycanlıların Soyqırımı tariximizin unudulmaz qanlı səhifəsidir!” və “Dizayn” kafedrasının müəllimi Pərvin Namazova “Heydər Əliyev və Azərbaycanlıların Soyqırımı Günü” adlı mövzularda çıxış ediblər.
Tədbirin sonunda Yeni Azərbaycan Partiyasının üzvlüyünə yeni qəbul olan tələbələrə üzvlük vəsiqələri təqdim edilib.