UNEC-də elmi fəaliyyətin rəqəmsallaşdırılması istiqamətində yeni addım
Azərbaycan Dövlət İqtisad Universitetində (UNEC) elmi fəaliyyətin rəqəmsallaşdırılması məqsədilə həyata keçirilən layihənin təqdimatı olub.
Tədbirdə çıxış edən rektor, professor Ədalət Muradov UNEC-də təhsilin və idarəetmənin rəqəmsallaşdırılması ilə yanaşı, elmi fəaliyyətin müasir texnologiyalarla inteqrasiyası və Akademik Məlumat İdarəetmə Sisteminin (AMİS) yaradılması istiqamətində işlərin beynəlxalq standartlara uyğun davam etdirildiyini bildirib. Bu sahədə tətbiq ediləcək yanaşmanın universitetin elmi fəaliyyətinin daha şəffaf, effektiv və dinamik şəkildə həyata keçirilməsinə imkan yaradacağını vurğulayıb.
Rektor yeni sistemin tədqiqatçıların fərdi veb səhifələrinin yaradılması, elmi nəticələrin izlənməsi, açıq arxiv tətbiqləri, akademik performansın qiymətləndirilməsi və institusional qiymətləndirmə hesabatlarının hazırlanması kimi mühüm funksiyaları özündə cəmləşdirdiyini bildirib. Bu sistemin elmi fəaliyyətin daha yaxşı analizinə və sistematik monitorinqinə imkan verəcəyini diqqətə çatdırıb.
Sonra Türkiyənin Orta Doğu Texniki Universitetinin professoru Adem Kalınlı dünya miqyasında bir çox qabaqcıl universitetlər tərəfindən tətbiq olunan “Balanslaşdırılmış Göstəricilər Sistemi” (Balanced Scorecard) əsasında hazırlanmış AVESİS sisteminin təqdimatını edib. O, sistemin beynəlxalq təcrübə nəzərə alınmaqla işlənib hazırlandığını və elmi fəaliyyətin monitorinqi, eləcə də qiymətləndirilməsi sahəsində bir çox faydalı alətlər təklif etdiyini bildirib. O, AVESİS-in tədqiqatçılarının fəaliyyətinin izlənilməsi ilə kifayətlənmədiyini, həm də kafedra və tədqiqat mərkəzlərinin performanslarının qiymətləndirilməsi və universitet səviyyəsində keyfiyyət təminatının inkişafına töhfə verəcəyini əlavə edib.
A.Kalınlı sistemin UNEC-də tətbiqinin elmi tədqiqatların daha effektiv şəkildə aparılmasına, akademik fəaliyyətin ölçülməsinə və qiymətləndirilməsinə imkan yaradacağını, eyni zamanda universitetin beynəlxalq səviyyədə tanınmasını və elmi nüfuzunun artırılmasını təmin edəcəyini diqqətə çatdırıb.
Təqdimatdan sonra professor Adəm Kalınlı sualları cavablandırıb.