UNEC Dizayn Məktəbinə bu il 8 nəfər əcnəbi tələbə qəbul olub
UNEC Dizayn Məktəbinin I kurs tələbələri ilə görüş keçirilib.
Görüşdə UNEC Dizayn Məktəbinin direktoru dos.Lalə Məmmədova, “Dizayn” kafedrasının müdiri dos.Elfanə Qasımova, UNEC Dizayn məktəbinin katibi, baş müəllim Aytən Ağayeva və tələbə təşkilatlarının sədrləri iştirak ediblər.
Məktəbin direktoru dos.Lalə Məmmədova tələbələri UNEC-ə daxil olmaları münasibətilə təbrik edərək, onlara təhsillərində uğurlar arzulayıb.
Görüşdə fakültəyə qəbul barədə də məlumat verilib. Bildirilib ki, UNEC Dizayn Məktəbinə “Dizayn” ixtisası üzrə azərbaycan və rus bölməsinə ümumilikdə 161 tələbə qəbul olub. Tələbələrdən 8 nəfərin əcnəbi vətəndaş olduğu qeyd edilib. Dizayn Məktəbinə keçid balının ötən illə müqayisədə artdığı, ən yüksək nəticənin isə azərbaycan bölməsində 283.2 bal olduğu diqqətə çatdırılıb.
Tələbələrə dizayn ixtisası üzrə dörd istiqamətdə kadr hazırlığının aparıldığını qeyd edən E.Qasımova, onlara dizayn ixtisasının incəlikləri, müasir dövrdə dizaynın rolu və əhəmiyyətindən də danışıb.
Sonra tələbələrin sualları cavablandırılıb.