UNEC-in Heydər Əliyev İqtisadi İrsinin Öyrənilməsi Mərkəzində Ulu Öndərin 100 illik yubileyinə həsr olunan tədbir keçirilib
YAP Səbail rayon təşkilatının İstiqlaliyyət 6 ünvanında yerləşən ərazi partiya təşkilatı və UNEC-in Heydər Əliyev İqtisadi İrsinin Öyrənilməsi Mərkəzinin birgə təşkilatçılığı ilə Ümummilli Lider Heydər Əliyevin anadan olmasının 100 illik yubileyinə həsr olunan tədbir keçirilib.
Tədbirin açılışında Ulu Öndər Heydər Əliyevin və şəhidlərin əziz xatirəsi ehtiramla yad edilib.
“İstiqlaliyyət 6” ünvanı üzrə ərazi partiya təşkilatının sədri, inzibati və təşkilati məsələlər üzrə prorektor dosent Şaiq Əsgərov tədbirin açılışında çıxış edərək, Ulu Öndər Heydər Əliyevin ölkənin sosial-iqtisadi inkişafındakı, eləcə də yeni neft strategiyasının formalaşmasındakı əvəzsiz xidmətlərindən söz açıb. Ümummilli Liderin siyasi xəttinin, zəngin dövlətçilik irsinin, əbədiyaşar ideyalarının öyrənilməsinin və yeni nəslə aşılanmasının əhəmiyyətini vurğulayıb.
Sonra UNEC-in “Maliyyə və audit” kafedrasının professoru, YAP-ın İdarə Heyətinin üzvü Elnur Sadıqov “Heydər Əliyev və Azərbaycanın iqtisadiyyatı”, kafedranın dosenti Zöhrab Paşayev isə “Heydər Əliyev100: reallıqlar və perspektivlər” mövzularında təqdimatla çıxış ediblər. Çıxış edənlər Ümummilli Lider Heydər Əliyevin Azərbaycana rəhbərliyinin hər iki dövrünün sosial-iqtisadi vəziyyətinin statistik təhlilini aparıblar. Ulu Öndərin xalqımızın qarşısındakı ən böyük xidmətlərindən birinin Azərbaycanda siyasi və iqtisadi sabitliyin təmin edilməsi, iqtisadiyyatın yenidən qurulması, davamlı inkişaf mərhələsinin başlanması olduğunu bildiriblər.
Tədbirdə Ulu Öndər Heydər Əliyevə həsr olunmuş videoçarx nümayiş olunub.
Sonda YAP-a yeni üzv olmuş UNEC-in tələbələrinə vəsiqələr təqdim edilib.
*
https://news.unec.edu.az/xeber/125-universitet/11059-unec-in-heyder-eliyev-i-gtisadi-i-rsinin-oyrenilmesi-merkezinde-ulu-onderin-100-illik-yubileyine-hesr-olunan-tedbir-kechirilib