UNEC rektoru tələbə təşkilatlarının rəhbərləri ilə virtual platformada görüşüb
UNEC-in rektoru, professor Ədalət Muradov universitetin tələbə təşkilatlarının rəhbərləri ilə onlayn görüş keçirib.
Rektor mövcud durumu nəzərə alaraq, tələbələrin onlayn dərslərinin təşkili ilə bağlı tətbiq olunacaq yeniliklərdən danışıb. Onlayn dərslərdə davamiyyət, kollokviumlar, sərbəst işlər, imtahanların təşkili barədə suallarını cavablandırıb. Rektor regionlarda yaşayan tələbələrin dərslərə rahatlıqla qoşulmaları üçün internet təminatı ilə bağlı müfaviq tədbirlərin nəzərdə tutulduğunu qeyd edib.
Görüşdə bildirilib ki, tələbələrin lazımi dərs materialları ilə təmin olunmaları üçün UNEC-in elektron kitabxanasından istifadə etmək imkanı yaradılacaq. Fakültə dekanlarının tələbələrlə Facebook üzərindən canlı yayımları təşkil olunacaq, eləcə də virtual platformada görüşləri keçiriləcək.
Rektor tələbələrin yeniliklərlə operativ məlumatlandırılması məqsədilə tələbə təşkilatlarının rəhbərlərini bu istiqamətdə operativ olmağa çağırıb. Onlara ölkədə baş verən sosial proseslərdə fəallıq göstərmələrini, vətəndaşlıq mövqelərini nümayiş etdirmələrini tövsiyə edib.