UNEC-in Mühəndislik fakültəsində Tələbə elmi konfransı keçirildi
Mühəndislik fakültəsində Tələbə Elmi Cəmiyyəti və mentorluq xidmətinin təşkilatçılığı ilə ümummilli lider Heydər Əliyevin 100 illiyinə həsr olunmuş “Azərbaycanda mühəndislik sahələrinin inkişafı: prioritetlər və çağırışlar” mövzusunda tələbə elmi konfransı keçirilib.
Konfransda fakültənin professor-müəllim heyəti və tələbələri iştirak ediblər.
Fakültə dekanı dosent Elçin Səmədov və Mühəndislik və tətbiqi elmlər kafedrasının müdiri professor Rövnəq Rzayev konfransın açılışında çıxış edərək, Mühəndislik fakültəsində fəaliyyət göstərən “Gənc mühəndis” elmi dərnəyinin keçirdiyi tədbirlər barədə məlumat veriblər. Təşkil olunan tələbə konfransında tədris ili ərzində tələbələr tərəfindən aparılan elmi araşdırmaların nəticələrinin təqdim olunmasının nəzərdə tutulduğunu diqqətə çatdırıblar.
Sonra sənaye, qida, material, ekologiya, maşın, elektrik və elektronika mühəndisliyi ixtisasları üzrə təhsil alan tələbələr müxtəlif aktual mövzular üzrə apardıqları araşdırmaları barədə məlumat veriblər. Təqdimatlarda neftlə çirklənmiş torpaqların rekultivasiyası tədbirləri, suyun keyfiyyət təyininin müasir üsulları, xidmət sektorunda ChatGPT platformasının tətbiqi, plastik qabların ətraf mühitə təsiri, tekstil sənayesi tullantılarının təkrar emalı və ekosistemdə rolu, meyvə və giləmeyvə xammalının emalında istifadə olunan innovativ texnologiyaları, qida əlavələrinin qidalanmada rolu, fermentlərin qida məhsullarına təsiri və s. sahələrdə aparılan tədqiqat işlərinin nəticələri açıqlanıb.
Sonda fərqlənən tələbələrə və rəhbərlərinə diplom və sertifikatlar təqdim olunub.
*
https://news.unec.edu.az/xeber/105-telebe/10267-unec-in-muhendislik-fakultesinde-telebe-elmi-konfransi-kechirildi