Ədalət Muradovun təklifinə münasibət bildirən Elm və Təhsil Nazirliyi yanında İctimai Şuranın sədri, professor Hikmət Əlizadə 525.az-a deyib ki, süni intellekt informasiya kommunikasiya texnologiyalarının inkişafının yüksək mərhələsidir. O müasir dövrdə gözəgörünməz tellərlə həyatımıza daxil olur və günü gündən öz nüfuz dairəsini genişləndirir. Hazırda məndə olan məlumata əsasən bir çox dünya universitetlərində süni intellekt istiqamətində kadr hazırlığına başlanmışdır. Ölkəmizdə də bu istiqamətdə kadr hazırlığına başlanması nəzərdə tutulur. Təbii ki, süni intellekt sahəsində kadr hazırlığı dünya təcrübəsinə əsaslanaraq texniki ixtisaslar üzrə kadr hazırlayan ali məktəblərdə həyata keçiriləcək.
Hikmət Əlizadənin sözlərinə görə, bu günlərdə UNEC rektoru, professor Ədalət Muradov Türk dövlətlərinin Süni İntellekt İnstitutunun yaradılmasını təklif edib. Təklif özünəməxsus maraq kəsb edir: “İlk növbədə, onu qeyd etməliyik ki, Türk Dövlətləri zaman-zaman öz fəaliyyətlərini birləşdirirlər. Bu baxımdan, təhsil sahəsində də inteqrasiya mühüm əhəmiyyət kəsb edə bilər. İkincisi onu bildirməyi özümə borc hesab edirəm ki, sünü intellekt bu gün müxtəlif sahələrə – ağır və yüngül sənayeyə, iqtisadiyyata, təhsilə, mədəniyyətə və s. daxil olur. Bu istiqamətdə süni intellekt sahəsində keyfiyyətli kadr hazırlığının həyata keçirilməsi institut çərçivəsində daha məqsədəuyğundur. Daha dəqiq ifadə etsaək, süni intellekt istiqamətində kadr hazırlığı müxtəlif elmlərin inteqrasiyası istiqamətində həyata keçirilməsi daha səriştəli mütəxəssislərin formalaşmasına imkan verə bilər”.