AR Mərkəzi Bankı yanında Maliyyə Monitorinqi Xidməti ilə görüş keçirilib
Azərbaycan Dövlət İqtisad Universitetinin prorektoru Əzizov Ə.İ., «Bank işi» kafedrasının müdiri prof. Z.F. Məmmədov və kafedranın əməkdaşları dos.Z.H.İbrahimov, prof.Bağırov M., dos.Zeynalov Z.H. iştirakı ilə Azərbaycan Respublikasının Mərkəzi Bankı yanında Maliyyə Monitorinqi Xidmətinin direktoru cənab Adışirin Qasımov ilə görüş keçirilib.
Görüşün məqsədi pulların leqallaşdırılmasına və terrorçuluğun maliyyələşdirilməsinə qarşı ölkəmiz tərəfindən aparılan mübarizə tədbirləri, bu sahədə bank sektoruna olan tələbləri barədə ictimaiyyətin maarifləndirilməsi, habelə maliyyə nəzarəti sahəsində peşəkar mütəxəssislərin yetişdirilməsi yolu ilə iki qurum arasında əməkdaşlığın inkişaf etdirilməsinə dair fikir mübadiləsinin aparılması olub.
Görüşün sonunda tərəflər bundan sonra da əməkdaşlığın davam etdirilməsinə dair razılığa gəliblər.
Azərbaycan Respublikasının Mərkəzi Bankı yanında Maliyyə Monitorinqi Xidməti 2009-cu ildən etibarən öz fəaliyyətinə başlayıb. Xidmətin əsas funksiyaları ölkəmizdə fəaliyyət göstərən bir çox monitorinq subyektlərindən, o cümlədən banklardan, maliyyə əməliyyatları barədə məlumatların əldə edilməsi, həmin məlumatlarda pulların leqallaşdırılması və ya terrorçuluğun maliyyələşdirilməsi əlamətlərinin olub olmamasının araşdırıb təhlil edilməsi və müvafiq məlumatların ölkəmizin hüquq-mühafizə orqanlarına ötürülməsidir. Ötən dövr ərzində, əsas funksiyalarla yanaşı Xidmət tərəfindən maliyyə və xüsusən bank sektorunda pulların leqallaşdırılmasına və terrorçuluğun maliyyələşdirilməsinə qarşı aparılan mübarizə tədbirləri barədə monitorinq subyektlərinin və ictimaiyyətin maarifləndirilməsi üzrə geniş miqyaslı tədbirlər keçirilib.