“Mevlana Mübadilə Proqramı”nın qalibləri ilə görüş keçirilib
Azərbaycan Dövlət İqtisad Universitetində (UNEC) “Mevlana Mübadilə Proqramı” çərçivəsində 2015/2016-cı tədris ilində təhsil alacaq tələbələrlə görüş keçirilib.
Görüşdə UNEC-in Beynəlxalq əlaqələr və proqramlar üzrə prorektoru, dosent Şahin Bayramov tələbələrə proqram haqqında ətraflı məlumat verib. Türkiyə Respublikasının Universitetləri və UNEC arasında imzalanan proqram protokolları əsasında həyata keçirilən “Mevlana Mübadilə Proqramı” çərçivəsində həyata keçirilən tələbə mübadiləsinin üstünlüklərindən danışıb. Bu il UNEC-dən 25 tələbə proqram çərçivəsində Türkiyənin nüfuzlu ali təhsil müəssisələrində – İstanbul Universiteti, Süleyman Demirel Universiteti, Anadolu Universiteti, Yildiz Teknik Universiteti, Gazi Universiteti, Mersin Universiteti, Beykent Universiteti, Akdeniz Universiteti, Çukurova Universiteti, Düzce Universiteti, Sakarya Universiteti və Erciyez Universitetində təhsil almaq imkanı qazandığını bildirən prorektor, tələbələrdən bəziləri bir neçə universitet tərəfindən seçilib deyə vurğulayıb.
Beynəlxalq əlaqələr departamentinin direktoru Müslüm İbrahimov tələbələrin proqramda iştirakı ilə bağlı bütün xərclər Yüksek Öğretim Kurulu Başkanlığının ödəyəcəyini bildirib. Qeyd edib ki, proqramı uğurla başa vuranlara “Mevlana Mübadilə Proqramı”nın sertifikatları təqdim ediləcək və tələbələrin əldə etdikləri kreditlər UNEC tərəfindən müvafiq qaydada tanınacaq.
“Mevlana Mübadilə Proqramı”nın məzunları öz təəssüratlarını danışıb, proqramın qaliblərinə təcrübələrindən söz açıblar. Sonda tələbələrin sualları cavablandırılıb.