UNEC-də Çinin Hebei İqtisadiyyat və Biznes Universitetinin nümayəndə heyəti ilə görüş və mədəni proqram təşkil olunub
Çinin Hebei İqtisadiyyat və Biznes Universitetinin (HUEB) nümayəndə heyəti və tələbələri hər iki universitet arasındakı əməkdaşlıq çərçivəsində UNEC-də rəsmi səfərdə olublar.
HUEB-in vitse-prezidenti xanım Du Hongmei, Beynəlxalq mübadilə mərkəzinin direktoru Shang Liwei və İncəsənət məktəbinin partiya katibi Liu Jingwang UNEC rektoru professor Ədalət Muradovla görüşüblər. Görüşdə universitetlərarası əməkdaşlığın daha da genişləndirilməsinin vacibliyindən bəhs olunub və gələcək hədəflər istiqamətində müzakirələr aparılıb.
Səfər çərçivəsində HUEB nümayəndələri UNEC-in Beynəlxalq İqtisadiyyat Məktəbində (ISE) tələbələrlə görüşüblər və onlara “Çin dili və mədəniyyəti” mövzusunda ustad dərs keçiblər. Tələbələrə çin dilinin öyrənilməsi ilə bağlı praktiki tövsiyələr verilib, eyni zamanda Çin mədəniyyətinə məxsus milli rəqslər nümayiş etdirilib.
Səfərin ən yaddaqalan hissəsi isə HUEB-in İncəsənət Məktəbinin tələbələrinin hazırladığı konsert proqramı olub. Konsertdə çinli tələbələr ənənəvi rəqslər və musiqi nömrələri ilə çıxış edərək UNEC auditoriyasına unudulmaz anlar yaşadıblar. Tədbirdə UNEC-in Rəqəmsal İqtisadiyyat fakültəsinin tələbəsi, Yaradıcılıq Mərkəzinin Vokal dərnəyinin üzvü Nadir Əzimli “Sənə də qalmaz” mahnısını səsləndirib.
Çinli tələbələrin ifasında xalq “Sarı gəlin” mahnısının səslənməsi izləyicilər tərəfindən böyük alqışlarla qarşılanıb.
İki ali təhsil müəssisəsi arasında əməkdaşlığın inkişafı çərçivəsində təşkil olunan səfər akademik və mədəni baxımdan olduqca zəngin proqramla yadda qalıb.