“Fitnə” filmi UNEC-in bütün tədris binalarında nümayiş etdirilib
Azərbaycan Dövlət İqtisad Universitetində (UNEC) Dini Qurumlarla İş üzrə Dövlət Komitəsinin sifarişi ilə hazırlanan dini ekstremizm və radikalizmin fəsadlarından bəhs edən “Fitnə” sənədli filmi nümayiş olunub.
UNEC-in bütün tədris binalarında nümayiş olunan film müəllim və tələbələr tərəfindən maraqla işzlənib. Nümayişdən öncə UNEC-in Yaradıcılıq Mərkəzinin direktoru Elman Cəfərov film barədə məlumat verib. Bildirib ki, filmdə dini radikalizmin qurbanı olan insanların, eləcə də cinayət məsuliyyətinə cəlb edilən şəxslərin timsalında bu problemin cəmiyyət və dövlətimiz üçün nə qədər təhlükəli olduğu dolğun şəkildə açıqlanır. Eyni zamanda, Azərbaycanda dinlər, məzhəblər arasında tarixən mövcud olan birlik və bərabərlik, xalqımızın tolerantlıq keyfiyyətləri, dövlətin bu sahədə həyata keçirdiyi siyasətin mahiyyəti qısa, lakin aydın şəkildə işıqlandırılır. E.Cəfərov filmin gənclərin dini radikal qrupların təsirindən qoruması istiqamətində mühüm rol oynayacağını vurğulayıb.