UNEC-in koordinatoru olduğu UNIVIA TEMPUS layihəsi Naxçıvan Dövlət Universitetində
Azərbaycan Dövlət İqtisad Universitetinin (UNEC) koordinatorluğu ilə “Beynəlxalq əlaqələr sahəsində universitet idarəçiliyinin inkişaf etdirilməsi və təkmilləşdirilməsi” TEMPUS UNİVİA layihəsi çərçivəsində Naxçıvan Dövlət Universitetində seminar keçirilib.
Seminarın əsas mövzusu layihənin Avropa tərəfdaşlarından olan İspaniyanın Malaqa Universitetində keçirilən təcrübə proqramının nəticələrinə həsr olunub. Tədbirdə layihə çərçivəsində qazanılan Avropa təcrübəsinin yerli tərəfdaş universitetlərdə beynəlxalq əlaqələrin inkişafına təsirindən və əhəmiyyətindən danışılıb.
UNEC-in işçi qrupu son iki ildə universitetin beynəlxalq əməkdaşlıq sahəsindəki nailiyyətlər, dünya universitetləri ilə elmi-nəzəri təcrübə mübadiləsi və müştərək elmi fəaliyyətin təşkili istiqamətində görülən işlər barədə seminar iştirakçılarına məlumat verib. UNEC-də 2015/2016-cı tədris ili üçün əcnəbi tələbələrin qəbulunun onlayn şəkildə olduğunu bildirib.
Koordinatoru Azərbaycan Dövlət İqtisad Universitetinin olduğu layihənin Azərbaycan tərəfdaşlarının təmsilçiləri Bakı Dövlət Universiteti, Sumqayıt Dövlət Universiteti, Gəncə Dövlət Universiteti və Naxçıvan Dövlət Üniversitetinin professor və müəllim heyəti də seminarda iştirak edib.