Səidə Əkbər qızı Xəlil
e-mail: [email protected]
2014-2018-ci illərdə Azərbaycan Dövlət İqtisad Universitetində (UNEC) Maliyyə və mühasibatlıq fakültəsində Maliyyə ixtisası üzrə bakalavr dərəcəsi almışdır. Bakalavr illərində Tələbə Həmkarlar İttifaqının fakültə üzrə büro üzvü olmuş, I Science Slime yarışında ikinci yeri tutmuş, Tələbə Elmi Cəmiyyətinin təşkil etdiyi bir çox elmi konfransa qatılaraq müxtəlif yerlərin sahibi olmuşdur. 2018-2020-ci illərdə UNEC-in Beynəlxalq Magistratura və Doktorantura Mərkəzində (BMDM) Bank işi ixtisaslaşması üzrə magistr dərəcəsinə başlamışdır. Magistratura müddətində I və II İqtisadiyyat və İdarəetmə Sahəsində Tədqiqatçıların Beynəlxalq Elmi Konfransında təşkilat komitəsində olmuş, eyni zamanda elmi məqalələrlə çıxış etmişdir. DAAD tərəfindən maliyyələşdirilən “EE-KEY-AZ Sahibkarlıq təhsili: Azərbaycanda iş yerlərinin yaradılması və məşğulluğun əsas amilləri” (EE-KEY-AZ Entrepreneurship Education: a Key to Job Creation and Employability in Azerbaijan) təlimində iştirak edərək Almaniyanın Siegen universitetinə akademik səfər etmişdir. Avropa Birliyi tərəfindən dəstəklənən Erasmus+ təqaüd proqramının qalibi olaraq Portuqaliyanın Porto şəhərində yerləşən ISAG-Avropa Biznes Məktəbində təhsil almışdır. Tələbəlik illərdə Azərbaycan Respublika Hesablama Palatasında Dövlət gəlirlərinin və iqtisadi sahələrin auditi şöbəsində təcrübə proqramında iştirak etmişdir. “Bank kreditləri sahibkarlığın inkişafında investisiya mənbəyi kimi” adlı dissertasiya mövzusunu müdafiə edərək fərqlənmə diplomuyla tam ali təhsilini başa vurmuşdur.
Türkiyə Bursları təqaüd proqramının qalibi olaraq 2021-ci ildən etibarən Dokuz Eylül Universiteti Sosial Elmlər İnstitutunda İqtisadiyyat üzrə doktorantura təhsilini davam etdirməkdədir. “Dairəvi İqtisadiyyat yanaşması çərçivəsində Azərbaycan üçün inkişaf strategiyası təklifi” mövzusunu araşdıran Səidə Xəlil 2024-cü ilin Oktyabr ayında Erasmus+ layihəsinin qalibi olaraq elmi işini İtaliyanın Sapienza Universitetində dairəvi iqtisadiyyat sahəsindən olan nüfuslu professorlara təqdim etmişdir. Cari ilin Dekabr ayında Özbəkistanda Urganch Ranch Texnologiya Universitetində keçirilən “Regionda davamlı iqtisadi artımın təmin edilməsinin prioritet istiqamətləri” mövzulu konfransa qəbul almışdır. Bundan başqa Orhun mübadilə proqramının qalibidir.
Səidə Xəlil 2023-ci ilin Fevral ayından etibarən İqtisadiyyat və işlətmə kafedrasında müəllim olaraq fəaliyyətə başlamışdır. 2023-ci ilin İyun ayından etibarən müəllim vəzifəsi ilə paralel UNEC Bloomberg maliyyə laboratoriyasının rəhbəri vəzifəsində çalışır. Rəhbərliyi dövründə dəfələrlə tələbə və müəllimlər üçün maliyyə bazarları təlimi təşkil edilmiş, təlimlərdə iştirak edən tələblərlə birlikdə Bloomberg tərəfindən keçirilən Global Trade Challenge yarışında 2453 komanda arasından 32-ci yeri qazanaraq regionda 2-ci yerə çıxıblar. Onlarla məqalə, kitab içi fəsilin müəllifidir.
