UNEC-in ETSN əməkdaşları üçün keçdiyi sertifikat təlimləri uğurla yekunlaşdı
Azərbaycan Dövlət İqtisad Universitetinin (UNEC) Ekologiya və Təbii Sərvətlər Nazirliyinin (ETSN) əməkdaşları üçün təşkil etdiyi “Təlimçilər üçün Təlim” (TOT) proqramını başa vurmuş şəxslərlə görüş keçirilib.
Rektor professor Ədalət Muradov ETSN-nin təklifi ilə nazirliyin əməkdaşlarının liderlik qabiliyyətlərini və yumşaq bacarıqlarını inkişaf etdirmək məqsədilə UNEC-də təşkil edilmiş “Liderlik mini MBA” və “Təlimçilər üçün Təlim” sertifikat proqramlarının uğurla nəticələndiyini diqqətə çatdırıb. Ədalət Muradov təlimlərin UNEC-də təşkil olunmasını ETSN tərəfindən bu ali təhsil müəssisəsinin təlim xidmətlərinə göstərilən yüksək qiymət kimi dəyərləndirib.
Rektor Ədalət Muradov sürətlə dəyişən dünyada universitetlərin bu dəyişikliyə çevik cavab verməsi üçün sertifikat proqramlarının əhəmiyyətinə diqqət çəkib: “Qəbul edirik ki, müasir universitet modeli ciddi çağırışlarla üz-üzədir. Həyat sürətlə dəyişir, lakin universitetlərin bu dəyişikliklərin sürətinə uyğun dəyişməsində problemlər mövcuddur. İnsanlar daim ixtisaslarını artırmalı, yeni-yeni ixtisaslara yiyələnməlidirlər. Çıxış yollarından biri hazırda dünyada geniş vüsət almış ömürboyu təhsilin təşkilidir. Sertifikatların işəgötürənlər tərəfindən qəbul edilməsi də ömürboyu təhsilin inkişafına və təhsil xidmətləri bazarının formalaşmasına müsbət təsir göstərə bilər. Bu baxımdan sertifikatı verən təşkilatların akkreditasiyasının təşkili də həllini gözləyən məsələlərdəndir. UNEC olaraq, belə bir akkreditasiya mərkəzinin yaradılması və onun beynəlxalq akkreditasiyadan keçirilməsini təmin etməyə hazırıq”.
Ekologiya və təbii sərvətlər nazirinin müavini Vüqar Kərimov sertifikat proqramlarının yeni bilik və bacarıqlara çevik yiyələnmək istiqamətində alternativsiz olduğunu diqqətə çatdıraraq, UNEC-də bu işlərin yüksək səviyyədə qurulduğunu bildirib. O, ETSN-nin Təlimlərlə bağlı İnkişaf Strategiyasında UNEC-in ən yaxın partnyor olduğunu diqqətə çatdırıb.
Çıxışlardan sonra rektor Ədalət Muradov və nazir müavini Vüqar Kərimov təlimi uğurla bitirmiş əməkdaşları təbrik edərək, onlara sertifikatları təqdim ediblər.