ADİU-da “Kitabi – Dədə Qorqud” eposuna həsr olunan tədbirləri davam edir
Mayın 1-də Azərbaycan Dövlət İqtisad Universitetində (ADİU) “Kitabi-Dədə Qorqud” eposunun alman dilinə tərcüməsinin və nəşrinin 200 illiyinə həsr olunan növbəti tədbir keçirilib. Tədbir Beynəlxalq İqtisadi Münasibətlər fakültəsində baş tutub.
Azərbaycan dili kafedrasının müdiri, filologiya elmləri doktoru Tofiq Əbdülhəsənli “Kitabi-Dədə Qorqud” eposunu dilimizin, tariximizin yadigarı kimi dəyərləndirib. Ölkə başçısı İlham Əliyevin “Kitabi-Dədə Qorqud”un alman dilinə ilk tərcüməsi və nəşrinin 200 illiyinin qeyd edilməsi haqqında sərəncamının icrası istiqamətində görülən işlərdən danışıb. Bildirib ki, “Kitabi-Dədə Qorqud” abidəsi alman şərqşünas alimi Fridrix Fon Dits tərəfindən üzə çıxarılıb. Sonradan isə nəşr edilərək dünya elm aləminə tanıdılıb.
Kafedranın dosenti Təranə Xəlilova “Kitabi-Dədə Qorqud” dastanları haqqında onun nəşri və tədqiqi tarixi, həmçinin Azərbaycan Qorqudşünaslığının aktual problemlərindən danışıb. Bildirib ki, bu dastanların ideya-bədii xüsusiyyətlərinin gənclərə aşılanmasının çox böyük önəmi, dəyəri var.