ADİU-da “Banklar Fəaliyyətdə” proqramının təqdimatı keçirilib
Mayın 5-də Azərbaycan Dövlət İqtisad Universitetində (ADİU) PAŞA Bank və Junior Achievement Azərbaycan təşkilatı “Banklar Fəaliyyətdə” proqramının yeni mərhələsinin başlanması ilə əlaqədar təqdimat və sınaq testi keçirilib.
Təqdimatda ADİU-nun İqtisadiyyat və Sənayevə Maliyyə fakültələrinin tələbələri iştirak edib. Proqramın təqdim etdiyi bankçılıq və şəxsi maliyyə üzrə interaktiv təlim, milli yarış və peşə təcrübəsi iştirakçı tələbələrə səmərəli istehlakçı və məsuliyyətli vətəndaş olmağa kömək edəcək.
Respublika üzrə seçilən 20 tələbə bankçılığın əsasları üzrə təlimlərə qatılacaq. Təlim kursunu Paşa Bank və Junior Achievement Azərbaycan təşkilatının mütəxəssisləri keçəcəklər. Növbəti mərhələdə tələbələr JAA təşkilatının kompüter modelləşdirməsi əsasında təşkil edilən “Banklar Fəaliyyətdə” yarışında iştirak edərək, öyrəndikləri bilikləri tətbiq edəcəklər. Modelləşdirmədə iştirak edərkən, tələbələr virtual bankı idarə edir və müxtəlif iqtisadi qərarlar qəbul edirlər. Ən yaxşı strategiya tərtib edən və rəqiblərindən daha artıq mənfəət qazanan komanda yarışın qalibi elan ediləcək.
Layihənin son mərhələsində yüksək nəticə əldə edən tələbələr banklarda təşkil olunan peşə təcrübəsində iştirak edəcəklər.