Ankara, 10 sentyabr, AZƏRTAC
Azərbaycan Dövlət İqtisad Universitetinin (UNEC) rektoru, professor Ədalət Muradov Türkiyəyə rəsmi səfər edib.
Ankaradakı Heydər Əliyev Parkının ziyarəti işə başlanan səfər çərçivəsində baş tutan görüşlərdə Azərbaycan Dövlət İqtisad Universiteti ilə Türkiyənin Gazi, Hacettepe, ODTÜ, Bilkent və TOBB İqtisadiyyat və Texnologiya universitetləri ilə əməkdaşlıq əlaqələrinin inkişaf etdirilməsi məsələləri müzakirə olunub və konkret razılaşmalar əldə edilib.
Qeyd olunan universitetlərin rektorları ilə əməkdaşlıq müqavilələri imzalayan professor Ədalət Muradov həmin universitetlərin fəaliyyəti ilə yaxından tanış olub. İmzalanan müqavilələrdə universitetlər arasında ikili diplom proqramlarının təşkili, tələbə və müəllim mübadiləsi, elmi-pedaqoji kadrların hazırlanmasına qarşılıqlı dəstək verilməsi, kitabxana-informasiya sistemlərinin inkişaf etdirilməsinə yardım edilməsi, “Mevlana” və “Erasmus+” kimi beynəlxalq proqramlarda əməkdaşlığın genişləndirilməsi, birgə elmi-tədqiqat və təlim layihələrinin təşkili kimi istiqamətlər üzrə real əməkdaşlığın həyata keçirilməsi nəzərdə tutulub.
Sabir Şahtaxtı
AZƏRTAC-ın xüsusi müxbiri