“Ali İqtisadiyyat Məktəbi” Milli Tədqiqat Universitetinin professoru ADİU-da mühazirə keçib
Mayın 4-5-də Azərbaycan Dövlət İqtisad Universitetində (ADİU) Rusiyanın “Ali İqtisadiyyat Məktəbi” Milli Tədqiqat Universitetinin Riyaziyyat departamentinin rəhbəri professor Fuad Ələsgərov mühazirə keçib.
“Universitetlərin müxtəlifliyi və tipologiyası” və “Ali təhsilə tələbatın qiymətləndirilməsi” mövzusunda keçirilən mühazirələrdə professor F.Ələsgərov ali təhsil müəssisələrinin klassifikasiyası, təqdim olunan ali təhsil xidmətlərinin keyfiyyət səviyyəsinə görə universitetlərin fərqli kateqoriyalara bölünməsi və bu amillərin tələbə qəbulu prosesində nəzərə alınması məsələlərindən danışıb. Bildirib ki, ayrı-ayrı ixtisaslar üzrə cari və potensial tələbin öyrənilməsi, ümumi tələbə sayında müxtəlif ixtisasların optimal xüsusi çəkisinin müəyyən edilməsi və təhsil prosesinin əmək bazarı ilə uyğunlaşdırılması hazırda ali təhsil müəssisələrinin qarşısında duran ən mühüm vəzifələrdir. Professor F.Ələsgərov “Ali İqtisadiyyat Məktəbi” Milli Tədqiqat Universitetinin bir qrup əməkdaşı tərəfindən reallaşdırılan tədqiqat layihəsinin qeyd olunan istiqamətləri əhatə etdiyini bildirib və tədqiqatın yekunları barədə ətraflı məlumat verib.
Professor F.Ələsgərov ADİU-nun doktorantları və gənc alimləri ilə görüşüb, elmi tədqiqatların səmərəliliyinin artırılması yolları və müasir tədqiqat metodları barədə fikirlərini bölüşüb.