Fevralın 26-da Azərbaycan Dövlət İqtisad Universitetində (UNEC) Almaniyanın Siegen Universitetinin Beynəlxalq əlaqələr ofisinin rəhbəri Ulrix Eberhardt ilə görüş keçirilib.
Görüşdə UNEC və Siegen Universiteti arasındakı tələbə mübadiləsi, ikili diplom proqramları, birgə layihələr və tədqiqatlar kimi bir çox əməkdaşlıq istiqamətləri müzakirə olunub.
Eyni zamanda koordinatoru Siegen Universiteti və Azərbaycandan yeganə tərəfdaş qismində çıxış edən UNEC-in birgə iştirak etdiyi “EE-KEY-AZ Sahibkarlıq təhsili: Azərbaycanda iş yerlərinin yaradılması və məşğulluğun əsas amilləri” (EE-KEY-AZ Entrepreneurship Education: a Key to Job Creation and Employability in Azerbaijan) layihəsinin hədəfləri və reallaşması məsələləri müzakirə olunub.
DAAD-ın Almaniyadakı baş ofisi tərəfindən keçirilən müsabiqədən uğurla keçən və qrant gazanan layihənin icrasına 2016-cı ildə başlanacaq və 4 il davam edəcək. Layihə çərçivəsində müntəzəm olaraq həm Almaniyada, həm də Azərbaycanda universitetlərin professor-müəllimlərinin, gənc alimlərin və tələbələrin iştirakı ilə işçi görüşlərin və təlimlərin keçirilməsi nəzərdə tutulur.
Qeyd edək ki, layihə Azərbaycanın ali təhsil müəssisələri arasında bu qəbildən olan ilk layihədir.