Beynəlxalq İqtisadiyyat Məktəbinin tələbəsi: “Əmək bazarında bizə daha çox üstünlük veriləcək” – MÜSAHİBƏ
Beynəlxalq İqtisadiyyat Məktəbinin II kurs tələbəsi Emil Alıyevin müsahibəsi:
– Emil, siz 680 balla UNEC-in Maliyyə fakültəsinə qəbul olunmuşdunuz. Prezident təqaüdünə layiq görülmüşdünüz. Sizi universitetdə ən çox bal toplayan tələbə kimi hamı tanıyırdı. Beynəlxalq İqtisadiyyat Məktəbinə keçməkdə məqsədiniz nə oldu?
– Beynəlxalq İqtisadiyyat Məktəbinə keçməkdə əsasən məqsədim burada təhsilin ingilis dilində olmasıdır. Mən Maliyyə fakültəsində oxuyarkən də təhsilin səviyyəsindən çox razı idim. Amma burada təhsilin ingilis dilində olması, üstəlik də xaricdə təhsil alan müəllimlərin təcrübə və biliklərini əldə etmək imkanı o qədər cazib gəldi ki, Beynelxalq İqtisadiyyat Məktəbinin Maliyyə ixtisasını seçdim. Mən ixtisas dəyişmədim, sadəcə UNEC-in bizə yaratdığı daha yaxşı imkanlardan yararlanmaq istədim.
– Öncə oxuduğunuz fakültə ilə Beynəlxalq İqtisadiyyat Məktəbi arasında fərq görürsünüz?
– Əlbəttə! Beynəlxalq İqtisadiyyat Məktəbində dərslər daha interaktiv və maraqlı keçirilir. Qrupda mövzu ətrafında çoxlu müzakirələr aparır, maraqlı faktlar üzə çıxarırıq. Müəllimlərimizin təcrübələrisayəsində praktik biliklər əldə edir və bütün yeniliklərlə tanış oluruq. Onu da deyim ki, başqa fakültələrə nisbətən, Beynəlxalq İqtisadiyyat Məktəbində tələbələr arasında rəqabət daha yüksəkdir. Bu da nəticədə təhsilin keyfiyyətinin artasına səbəb olur.
– Beynəlxalq İqtisadiyyat Məktəbinin üstünlüklərini saya bilərsiniz? Bu məktəb sizə hansı fərqli imkanları yaradır?
– Mənim üçün Beynəlxalq İqtisadiyyat Məktəbinin ən önəmli üstünlüyü təhsilin məhz ingilis dilində olmasıdır. Bu, gələcəkdə bizim xaricdə təhsil almamızı asanlaşdırır. Belə ki, biz bakalavr təhsilimizi ingilis dilində almaqla, xaricdəki bəzi təhsil proqramlarına rahat şəkildə qoşula bilərik. Bundan başqa, xarici şirkətlərdə işə qəbul zamanı dil biliyinə önəm verilir. Bu baxımdan da Beynəlxalq İqtisadiyyat Məktəbinin tələbələri bir addım öndədir. Demək ki, əmək bazarında bizə daha çox üstünlük veriləcək. Beləcə, bizim fakültənin tələbələri məzun olduqda nəzəri biliklərlə yanaşı, həm də praktiki biliklərə sahib olmuş olacaqlar. Bu da uğurlu karyera qurmaqda bizim imkanlarımızı xeyli artırır. Növbəti üstünlüyümüz isə Beynəlxalq İqtisadiyyat Məktəbində Avropa universitetlərinin dərsliklərindən istifadə etməyimizdir. Bu da sırf dil məhdudiyyəti olmadığına görədir və bu dərsliklər sayəsində biz daha faydalı biliklərə yiyələnirik.
– Dediniz ki, Beynəlxalq İqtisadiyyat Məktəbində sizi cəlb edən üstünlüklərdən biri xaricdə təhsil alan müəllimlərin dərs deməsidir. Bu müəllimlərin dərsi digərlərindən nə ilə seçilir?
– İstəmirəm müəllimlərimizdən kimsə incisin, amma xaricdə təhsil alan müəllimlərin dərs demək metodu tamam fərqlidir və bu fərq hiss olunacaq dərəcədədir.Həmin müəllimlər dünyanın nüfuzlu universitetlərində təhsil alıblar və orada mənimsədikləri təhsil sistemini Beynəlxalq İqtisadiyyat Məktəbində tətbiq edirlər.Bu tədris metodikası tamamilə fərqlidir. Onlar elm sahəsində əldə edilən ən vacib və ən yeni məlumatları bizə çox asan yolla ötürürlər. Xaricdə təhsil alan müəllimlərimiz Beynəlxalq İqtisadiyyat Məktəbində bizə sanki Avropa təhsilinin abu-havasını yaradırlar.
– Beynəlxalq İqtisadiyyat Məktəbi tələbələrinin UNEC-in ictimai həyatındakı rolu necədir?
– Bizim fakültədə əsasən hələ məktəbdə ikən fəallıq nümayiş etdirən uşaqlar toplaşıb. Məsələn, mən özüm təhsil aldığım 74 saylı orta məktəbdə oxuyarkən riyaziyyat üzrə rayonlararası olimpiyadada iştirak etmişəm. Bundan başqa, basketbol üzrə 7 qat Bakı cempionu, 2 qat respublika cempionu olmuşam. Əlavə məşğuliyyətlərim isə kitab oxumaq və sənədli filmlərə baxmaqdır. Universitetimizdə isə İqtisadçı Gənclər Akademiyasının baş katibi, Tələbə Gənclər Təşkilatının isə fakültə sədriyəm. Beynəlxalq İqtisadiyyat Məktəbinin əksər tələbələri UNEC-in ictimai heyatında böyük rol oynayırlar.Tələbələrimizin digər tələbələrdən xüsusi ilə seçilən ingilis dili bacarıqları olduğu üçün ingilis dilində təlimlər və danışıq klubları təşkil edirlər. Eyni zamanda, birlikdəbir neçə bilik yarışını da təşkil etmişik. İndi də yenikreativ ideyalarımızı həyata keçirməyə davam edirik. Bunun üçün universitetdə bizə hər cür şərait yaradılır.