ADİU-nin Əmtəəşünaslıq fakültəsində Tələbə Elmi Cəmiyyətinin konfransı keçirilib
17 aprel 2015-ci il tarixdə Əmtəəşünaslıq fakültəsində Ümummilli Lider Heydər Əliyevin 92-ci ildönümünə həsr olunmuş «Heydər Əliyev irsi və Azərbaycanın aqrar siyasəti» mövzusunda Tələbə Elmi Cəmiyyətinin konfransı keçirilib. Tədbiri giriş sözü ilə konfransın sədri, “Qeyri-ərzaq mallarının əmtəəşünaslığı və ekspertizası” kafedrasının müdiri prof. Ə.P.Həsənov açaraq, Heydər Əliyevin əvəzedilməz dahi şəxsiyyət kimi ölkəmizin siyasi və iqtisadi həyatındakı rolundan və zəngin həyat fəaliyyətindən danışıb. Eyni zamanda bildirib ki, müasir dövrdə istehlak bazarının yüksək keyfiyyətli mallarla təchiz olunmasında və istehlakçıların dəyişən tələblərinin ödənilməsində keyfiyyət üzrə mütəxəssislərin rolu əvəzedilməzdir. Bu istiqamətdə respublikamızda yüksəkixtisaslı ekspert mütəxəssislərinin hazırlanmasında fakültəmizin ixtisas kafedralarının çox böyük rolu vardır. Bu baxımdan tələbələrin elmi-tədqiqat işlərinə cəlb olunmaları, onların maraqlı mövzularla çıxış etmələri təqdirəlayiqdir.
Konfransda «İstehlak mallarının ekspertizası və marketinqi» və «Metrologiya, standartlaşdırma və sertifikasiya mühəndisliyi» ixtisasları üzrə təhsil alan 21 tələbə maraqlı və aktual mövzularla çıxış ediblər. Tələbələr öz çıxışlarını müasir texnologiyalardan istifadə etməklə interaktiv şəkildə qurublar. Aktual mövzular üzrə çıxışlar diskussiya şəklində davam etdirilib.