“E-ticarət və tələb etdiyi bilik bacarıqlar” mövzusunda vebinar keçiriləcək

20 SENTYABR 2021

Sentyabrın 22-də saat 19:00-da “E-ticarət və tələb etdiyi bilik bacarıqlar” adlı tədbir keçiriləcək.

Azərbaycan Respublikasının Təhsil İnstitutunun təşkilatçılığı ilə “İş dünyası və ali təhsildə trendlər” onlayn vebinarlar silsiləsindən olan növbəti tədbirin spikeri Amazon şirkətinin Avropa Birliyi üzrə mərkəzində biznes analitik vəzifəsində çalışan Yaşar Əhmədov olacaq.

Yaşar Əhmədov 2007-2011-ci illərdə Türkiyənin Orta Doğu Texniki Universitetində (OTDÜ) “Sənaye mühəndisliyi” ixtisası, 2013-2015-ci illərdə Finlandiyanın Vaasa Universitetinin “Sənayenin idarə edilməsi” ixtisası, 2020-2021-ci illərdə isə Massaçusetts Texnologiya İnstitutunun “Təchizat Zəncirlərinin İdarə Edilməsi” ixtisası üzrə təhsil alıb. O, dünyanın ən böyük kimya istehsalçısı BASF şirkətinin Sumqayıtdakı zavodunda anbardar, “Karbamid Zavodu” layihəsində konsultant, Nestle şirkətində azsaylı yerli mühəndislərdən biri kimi çalışıb. Daha sonra BASF şirkətinin Sumqayıt şəhəri üzrə istehsalat müdiri və Dubay şəhərində istehsalın planlaşdırılması üzrə mütəxəssis kimi işləyib. Vebinar təhsil idarəçiləri, işçilər, sənaye sahəsinin nümayəndələri və tələbələr üçün nəzərdə tutulmuşdur. Azərbaycan dilində keçiriləcək tədbirdə iştirak üçün məhdud sayda yer mövcuddur.

İştirak etmək üçün 20 sentyabr 2021-ci il tarixinədək göstərilən keçiddən qeydiyyatdan keçmək lazımdır: https://forms.office.com/r/Dpba0HE4md