Noyabr 13-də Azərbaycan Respublikasının Qiymətli Kağızlar üzrə Dövlət Komitəsi (QKDK) və Bakı Fond Birjasının (BFB) birgə təşkilatçılığı ilə Azərbaycan Dövlət İqtisad Universitetinin (UNEC) tələbələri arasında keçirilən “Gənc İnvestor 2015” müsabiqəsinin qaliblərinin mükafatlandırılma mərasimi keçirilib.
İlk üç yerin qalibləri UNEC-in Beynəlxalq İqtisadiyyat Məktəbinin tələbələridir. Məktəbin 4-cü kurs tələbəsi Əli Orusov 1-ci yerə,3-cü kurs tələbəsi Aida Həsənova 2-ci yerə, 4-cü kurs tələbəsi Sevinc Əliyeva isə 3-cü yerə layiq görülüb.
Tədbirdə QKDK-nın sədr müavini İlqar Muradov müsabiqə barədə iştirakçılara ətraflı məlumat verib. Tələbələrin peşəkar kadr kimi hazırlanması, qiymətli kağızlar bazarı sahəsində yüksək bilik və hazırlığının formalaşdırılması, həmçinin onların nəzəri biliklərini praktikada düzgün tətbiq etmək potensiallarının artırılması istiqamətində tədbirin zəruri əhəmiyyətə malik olduğunu vurğulayıb. İ.Muradov QKDK-nın UNEC-lə də davamlı əməkdaşlıq əlaqələrinin qurulduğuna və bunun məntiqi nəticəsi kimi Anlaşma Memorandumunun imzalandığına diqqət çəkərək tələbələrə çoxsaylı maarifləndirici tədbirlərin həyata keçirildiyini bildirib.
UNEC-in tələbələrlə iş üzrə prorektoru Səadət Qəndilova tələbələrin maarifləndirilməsi, bilik və bacarıqlarının yüksəldilməsi istiqamətində davamlı tədbirlər həyata keçirdiklərinə görə təşkilatçılara təşəkkürünü bildirib. Tələbələr üçün yaradılmış bu şəraitin onların əsl mütəxəssis kimi yetişmələrində və gələcək əmək fəaliyyətlərində böyük rol oynayacağına əminliyini ifadə edib.
Tədbirin davamında finalçıların maliyyə çətinliyi ilə qarşılaşan şirkətin qiymətli kağızlar bazarı vasitəsilə maliyyələşməsi problemini həll etməklə bağlı təkliflərini əks etdirən təqdimatları dinlənilib.
Sonda müsabiqənin bütün iştirakçılarına sertifikatlar verilib və ilk üç yerin qaliblərinə pul mükafatı və dəyərli hədiyyələr təqdim olunub.