Keyfiyyət elçiləri UNEC-də tədrisin keyfiyyətinin artırılmasına təkan verəcəklər
Azərbaycan Dövlət İqtisad Universitetində (UNEC) tədris ilinin ikinci semestrindən etibarən keyfiyyət elçiləri tədrisin keyfiyyətinin yüksəldilməsi, onun təşkili prosesində mövcud problemlərin müəyyən edilməsi və bu prosesin daha səmərəli təşkili ilə əlaqədar monitorinqlər aparacaqlar.
UNEC rektoru, professor Ədalət Muradovun iştirakı ilə keçirilən görüşdə keyfiyyət elçilərinə onların vəzifələri, iş prinsipi və fəaliyyət istiqamətləri izah edilib. Tədrisin sillabuslarda və təqvim-tematik planlarda qeyd edilən mövzulara uyğunluğu, mühazirə mətnləri, interaktiv tədris vəsaitləri, müəllimlərin mövzuya hakimliyi, dərs vaxtının optimal şəkildə idarəedilməsi, mühazirə və seminar dərslərinin təşkili ilə əlaqədar vəziyyət, seminar dərslərində mövzu üzrə praktiki nümunələrin izahı, kollokviumlara hazırlıq və digər göstəricilər monitorinqlər zamanı qiymətləndiriləcək kriteriyalara daxildir.
Monitorinqlərin nəticələri təhlil edildikdən sonra müəllimlərin daha yüksək səviyyəli tədris həyata keçirə bilməsi üçün təlim ehtiyacları, fənlərin sillabuslarının beynəlxalq standartlara uyğunlaşdırılması və təkmilləşdirilməsi istiqamətində təkliflər hazırlanacaq.
Qəbul edilən qərara əsasən, keyfiyyət elçiləri tərəfindən monitorinqlər ilkin mərhələdə “Maliyyə və mühasibat” fakültəsində keçiriləcək.
Tədbirin sonunda UNEC-də tədrisin keyfiyyətinin yüksəldilməsi ilə bağlı keyfiyyət elçilərinin təklifləri dinlənilib.
Qeyd edək ki, keyfiyyət elçilərinin müəyyən edilməsində elektron universitet platformasını aktiv istifadə edə bilməsi, müasir təhsil metodologiyasına və interaktiv tədris prosesinə yaxından bələd olması əsas meyar seçilib.