Azərbaycan Dövlət İqtisad Universitetinin (UNEC) “Lider müəllim – Lider universitet” layihəsi uğurla davam etdirilir. Layihədə iştirak etmək istəyən müəllimlərin qeydiyyatı gedir. Müəllimlər universitetin rəsmi saytından “Lider müəllim-lider universitet” bölməsinə daxil olaraq, elektron ərizə formasına müvafiq məlumatlarl qeyd etməklə layihədə iştiraklarını təsdiqləyirlər. Komissiya daxil olan esseləri qiymətləndirdikdən sonra, müsabiqəyə qatılmaq hüququ qazananları müəyyənləşdirərək siyahını açıqlayacaq. Müsabiqədə iştirak könüllülük əsasında aparılır və iyunun 30-dək davam edəcək.
Qeyd edək ki, “Lider müəllim-lider universitet” layihəsinə oktyabrın 1-dən start verilib. Layihənin məqsədi UNEC-in professor-müəllim heyətinin peşəkarlıq qabiliyyətinin daha da yüksəldilməsi, onların elmi tədqiqata, şəxsi inkişafa, sosial fəaliyyətə, işgüzar əlaqələrə olan marağının artırılmasından ibarətdir.
Layihəyə uyğun olaraq, pedaqoji heyət arasında 7 kriteriya üzrə – “Lider müəllim – innovativ müəllim”, “Lider müəllim – peşəkar müəllim”, “Lider müəllim – tədqiqatçi müəllim”, “Lider müəllim – sevimli müəllim”, “Lider müəllim – təşəbbüskar müəllim”, “Lider müəllim – ixtiraçi müəllim” və “Lider müəllim – özünü inkişaf etdirən müəllim” müsabiqə keçiriləcək.
“Lider müəllim – innovativ müəllim” və “Lider müəllim – təşəbbüskar müəllim” üzrə qiymətləndirməni beş nəfərdən ibarət komissiya müəyyən edəcək. Onlar müsabiqədə iştirak edən müəllimə əvvəlcədən xəbər vermədən 4 dərsdə (2 mühazirə, 2 məşğələ olmaqla) iştirak edərək, meyarlar üzrə qiymətləndirmə aparacaq. Müsabiqənin yekununda ən yüksək nəticə göstərən müəllimlərin balları eyni olarsa, o zaman Differensial əmək haqqı sistemindəki “Tələbə Məmnunluq Anketini”ndə daha yüksək bal alan şəxs qalib seçiləcək.
“Lider müəllim – innovativ müəllim” kriteriyasının qiymətləndirmə meyarları innovativ tədris metodlarından istifadə, Elektron Universitet Modelindən yararlanma və tədris resurslarının yenilənmə səviyyəsinə görə 10 ballıq sistemlə aparılacaq. “Lider müəllim – təşəbbüskar müəllim” kriteriyası isə tədris prosesinin təkmilləşdirilməsi, işgüzar və ictimaiyyətlə əlaqələrinin inkişafı, eyni zamanda idman və sosial mövzuda layihələrin həyata keçirilməsi ilə bağlı təşəbbüsün sayına görə qiymətləndiriləcək.
Digər 5 kriteriya isə UNEC-də tətbiq edilən professor-müəllim heyətinin xidməti fəaliyyətinin qiymətləndirilməsinə əsaslanan differensial əmək haqqı sisteminin müvafiq bölmələrinin nəticələrinə əsaslanaraq aparılacaq.
Layihənin sonunda qalib müəllimlər mükafatlandırılacaq. Layihəyə uyğun olaraq, müxtəlif nominasiyalar üzrə seçiləcək “Lider müəllim”lər 7 gün müddətində nüfuzlu universitetlərə səfər imkanı qazanacaqlar.