“QS STARS” audit nəticələrinə əsasən, UNEC 5 ulduza layiq görüldü!
Azərbaycan Dövlət İqtisad Universiteti (UNEC) 95 illik yubileyi ərəfəsində yeni uğura imza atıb.
Belə ki, UNEC dünyanın nüfuzlu reytinq agentliklərindən olan “QS Quacquarelli Symonds” tərəfindən aparılan “QS Stars” auditində 7 kateqoriya üzrə maksimal 5 ulduz (“mükəmməl”) ilə qiymətləndirilib.
Ümumilikdə 9 fərqli kateqoriya üzrə aparılan auditdə UNEC-in tədris prosesi, məzunların məşğulluğu, idarəetmə sistemi, infrastrukturu, maliyyə, inklüziv mühiti, sosial aktivlik, beynəlxalq əməkdaşlıqla bağlı fəaliyyətləri maksimum 5 bal ilə qiymətləndirilib. Bu nəticə UNEC-də həmin sahələr üzrə fəaliyyətin dünya standartlarına uyğun həyata keçirildiyini bir daha təsdiqləyir.
Kateqoriyalar üzrə auditin nəticələri aşağıdakı kimidir:
Tədris – 5 ulduz (mükəmməl)
– UNEC tədris proseslərinin tam rəqəmsallaşdırılması sahəsində beynəlxalq standartlara cavab verməklə, eləcə də tədris prosesinin müasir həllərlə keyfiyyət təminatına görə bu kateqoriya üzrə 5 ulduza layiq görülüb.
İnfrastruktur – 5 ulduz (mükəmməl)
– UNEC bu kateqoriya üzrə mükəməlliyə kampus infrastrukturu, kitabxana, kampusdaxili klinika, tələbə təşkilatlarının fəaliyyətinin yüksək səviyyədə təşkilinə görə layiq görülüb.
Proqram nüfuzu: Maliyyə – 5 ulduz (mükəmməl)
– Magistr təhsil pilləsində “Maliyyə” ixtisasının tələbələrinin məşğulluq səviyyəsi, məmnuniyyəti və digər parametrlər üzrə qiymətləndirmə nəticələrinə əsasən, UNEC 5 ulduza layiq görülüb. Xüsusilə təqdirəlayiq element UNEC-in 3 ixtisasının beynəlxalq FİBAA akkreditasiyasından keçməsi olub.
- Məşğulluq – 5 ulduz (mükəmməl)
– Məzunların işlə təminatı, tələbələrə təcrübə proqramları üçün göstərilən dəstək xidmətləri, ölkəmizdə, eləcə də xaricdə özəl və dövlət qurumlarında çalışan 2000-dən çox nüfuzlu məzun sayəsində reallaşan güclü sənaye əlaqələri ilə bu önəmli nailiyyət qazanılıb.
Effektli İdarəçilik – 5 ulduz (mükəmməl)
– Tam rəqəmsal sənəd dövriyyəsi sistemi, inzibati proseslərin elektron vasitələrlə həyata keçirilməsi, strateji hədəflərin dəqiq ölçüləbilən və detallı fəaliyyət planı ilə əhatə olunması, müasir çağırışlara cavab verən idarəetmə sistemi sayəsində UNEC 5 ulduza layiq görülüb.
Sosial Təsir – 5 ulduz (mükəmməl)
– UNEC-in həyata keçirdiyi sosial layihələr, xüsusi kateqoriyaya aid olan tələbələrə göstərilən dəstək mexanizmləri, strateji fəaliyyət planına əsasən sosial istiqamətdə nəticəyönümlü addımlar UNEC-ə bu kateqoriya üzrə 5 ulduz qazandırıb.
Fərqlilik, bərabərlik və inklüzivlik – 5 ulduz (mükəmməl)
– UNEC beynəlxalq standartlara cavab verən yüksək səviyyəli təhsil müəssisəsi olaraq, inklüziv təhsilə xüsusi önəm verir, hər bir tələbəyə bərabər imkanlar yaradır.
Akademik inkişaf – 4 ulduz (çox yaxşı)
– UNEC-də tələbələrin akademik inkişafına xüsusi diqqət yetirilir. Universitet daim təhsil proqramlarını yeniləyir, müəllimlərin və tələbələrin elmi fəaliyyətini dəstəkləyir və onların beynəlxalq akademik mühitə inteqrasiyasına şərait yaradır.
Qlobal fəallıq – 4 ulduz (çox yaxşı)
– UNEC beynəlxalq istiqamətdə dünyanın qabaqcıl ali təhsil və tədqiqat müəssisələri ilə qurduğu güclü əlaqələr, eləcə də ikili diplom, mübadilə proqramlarının effektiv tətbiqi nəticəsində bu göstəriciyə nail olub.