Rektor tələbələri bütün tədris binalarında qəbul edəcək
Azərbaycan Dövlət İqtisad Universitetinin (UNEC) rektoru, professor Ədalət Muradov Türk dünyası işlətmə fakültəsinin 1-ci kurs tələbələri ilə görüş keçirib.
UNEC-də həyata keçirilən yeniliklərdən danışan rektor qeyd edib ki, açıqlanan son hesabata görə Azərbaycan Dövlət İqtisad Universiteti tələbə sayına əsasən ölkənin ən böyük ali təhsil müəsissəsidir. Strateji hədəflərdən bəhs olunarkən, tələbələrin yerli və dünya əmək bazarının tələblərinə uyğun kadr kimi hazırlanmasının qarşıda duran əsas istiqamət olduğu vurğulanıb.
Çıxış zamanı universitetin beynəlxalq əlaqələri mövzusuna toxunulub və bildirilib ki, xarici universitetlərlə əməkdaşlığın UNEC-də tədrisin müasir standartlarla təşkilinə müsbət təsir etməkdədir. Türk dünyası işlətmə fakültəsindəki dərs proqramlarında İstanbul Universiteti nümunəsinin əsas götürülməsi ilə tədrisin keyfiyyəti xüsusilə fərqlənir. Fakültə məzunlarının həm UNEC, həm də İstanbul Universitetinin diplomunu əldə etməsi isə geniş imkanlar yaratdığı qeyd olunub.
Bütün bu imkanların tələbələr üçün yaradıldığını deyən rektor gənclərə universiteti müvəfəqiyyətlə başa vurmağı tövsiyə edib. Təbələrin hər bir müraciətini şəxsi facebook səhifəsində cavablandırdığını vurğulayan rektor əlavə edib ki, noyabr ayından etibarən tələbələrin qəbulu növbəli şəkildə bütün tədris binalarında keçiriləcək.
Tələbələr onları narahat edən məsələlərlə bağlı rektora suallarını ünvanlayıblar.