Tələbələr memorandum imzalayıb
Martın 3-də Azərbaycan Dövlət İqtisad Universitetində (UNEC) “İqtisadçı Tələbələrin Elmi Fəaliyyətinə Yardım” İctimai Birliyi və “Azərbaycan İntellektual Oyunlar Klubu” İctimai Birliyi arasında əməkdaşlıq haqqında memorandum imzalanıb.
Sənədə əsasən, gənclərin asudə vaxtlarının səmərəli təşkili, onların intellektual fəaliyyətə cəlb edilməsinə şərait yaratmaq üçün birgə intellektual yarışlar və digər tədbirlər keçiriləcək. Eyni zamanda tərəflər təşkil olunacaq tədbirlərdə qarşılıqlı dəstək, gənclərin yeni biliklər əldə etmələrinə və onlar arasında sağlam rəqabət mühitinin formalaşdırılmasına şərait yaradacaqlar.
Memorandumu “İTEFY” İB tərəfindən sədr Hidayət Kərimov, “AİOK” İB tərəfindən isə icraçı direktor Aydın Piriyev imzalayıb.
İmzalanma mərasimindən sonra tərəflər arasında intellektual oyunların keçirilməsi haqqında müzakirələr aparılıb. Tədbirdə “İTEFY” İB-nin idarə heyətinin üzvləri və fəalları və “AİOK” İB-nin idarə heyətinin üzvləri iştirak edib.