“Təmiz Şəhər”in “Re-Life” layihəsi UNEC-də
Azərbaycan Dövlət İqtisad Universitetinin (UNEC) İqtisadiyyat fakültəsində “Re-Life” layihəsinin təqdimatı keçirilib. “Təmiz Şəhər” ASC-nin ADA Universiteti ilə birgə həyata keçirdiyi layihə çərçivəsində UNEC-də tullantıları çeşidləmək üçün xüsusi qutular yerləşdirilib.
“Təmiz Şəhər” ASC-nin şöbə müdiri Faiq Məmmədov UNEC-in tələbələri üçün “Bərk məişət tullantılarının idarə olunması” mövzusunda mühazirə oxuyub. Bildirilib ki, Balaxanıda yerləşən Bərk Məişət Tullantılarının Çeşidlənməsi Zavodunda il ərzində 200 min ton tullantını çeşidlənir. Polietilen, karton, kağız, plastik və digər materiallar ümumi tullantı kütləsindən ayrılır və xammal kimi təkrar emal müəssisələrinə göndərilir. Bu tullantıların təkrar emalı ekoloji fəsadların qarşısını alır. Belə ki, əksər qeyri-orqanik tullantıların çürümə prosesi yüz illərlə davam edir.
*
Bərk Məişət Tullantılarının Yandırılması Zavodunun fəaliyyəti barədə məlumat verən Faiq Məmmədov, zavodun istehsalat gücünə görə Şərqi Avropada və MDB məkanında ən iri bu tipli müəssisə olduğunu vurğulayıb. Dördüncü nəsil (4G) texnologiyaların tətbiqi ilə qurulan bu müasir zavod Avropa Birliyinin ətraf mühitin mühafizəsi sahəsində standartlarına tam uyğundur.
Mühazirədən sonra tələbələrin iştirakı ilə universitetdə çeşidləmə qutuları yerləşdirilib.
