Ümumdünya Əqli Mülkiyyət Təşkilatının nümayəndələri ADİU-da olub
Aprelin 14-də Azərbaycan Dövlət İqtisad Universitetində (ADİU) Ümumdünya Əqli Mülkiyyət Təşkilatının (ÜƏMT) nümayəndələri İzabella Pimenteli və Giulio Zanetti ilə görüş keçirilib. Görüşdə Standartlaşdırma, Metrologiya və Patent üzrə Dövlət Komitəsinin nümayəndələri də iştirak edib.
Beynəlxalq əlaqələr və proqramlar üzrə prorektor Şahin Bayramov qonaqlara ADİU-da həyata keçirilən kadr hazırlığı istiqamətləri və unversitetin beynəlxalq əlaqələr haqqında ətraflı məlumat verib, ADİU ilə Ümumdünya Əqli Mülkiyyət Təşkilatı (ÜƏMT) arasındakı əməkdaşlıqdan danışıb. Ş.Bayramıv əqli mülkiyyət və patent məsələləri üzrə maarifləndirmə işinin gücləndirilməsi sahəsində ÜƏMT ilə əməkdaşlığın inkişafında maraqlı olduqlarını diqqətə çatdırıb.
Texnologiya Transfer Mərkəzinin (TTM) direktoru Aydın Hüseynov mərkəzin fəaliyyəti haqqında danışıb. Bildirib ki, universitetdə “Patent işi və ixtiraçılıq” ixtisaslaşma kursu tədris olunur. Kursa ADİU-nun 15 müəllimi cəlb olunub. A.Hüseynov TTM-də çalışan işçilərin ÜƏMT akademiyasında təkmilləşdirmə kurslarında sertifikatlaşdırılması məsələlərini də qeyd edib.
Giulio Zanetti universitetdə təlim kursunun keçirilməsini yüksək qiymətləndirib və “training of trainers” fəaliyyətlərinin davam etdirilməsini tövsiyə edib.
Diskussiya zamanı İzabella Pimenteli ÜƏTM Akademiyasının əsas məqsəd və imkanlarından, dünya miqyasında Texnologiya və İnnovasiya Dəstəyi Mərkəzlərin yaradılmasından və onlara mümkün dəstək formalarından danışıb. Müzakirə olunan istiqamətlərdə Standartlaşdırma, Metrologiya və Patent üzrə Dövlət Komitəsi və ADİU ilə birgə fəaliyyətlərin inkişaf etdirilməsi məsələsi vurğulanıb.