UNEC-də “Avrasiyanın Arteriyaları” adlı kitabının təqdimatı keçirilib
Tanınmış iqtisadçı-ekspert, UNEC-in müəllimi Eldəniz Əmirovun müəllifi olduğu “Avrasiyanın Arteriyaları” adlı kitabının təqdimat mərasimi keçirilib.
Kitabxana İnformasiya Mərkəzinin təşkilatçılığı ilə keçirilən təqdimat mərasimində UNEC-in əməkdaşları ilə yanaşı, millət vəkilləri, müxtəlif dövlət qurumlarının rəhbər şəxsləri, tanınmış politoloqlar, iqtisadçı ekspertlər, media nümayəndələri və digər qonaqlar iştirak ediblər.
Prorektor, dosent Şaiq Əsgərov tədbirin açılışında çıxış edərək, UNEC-in məzunu, tanınmış iqtisadçı ekspert Eldəniz Əmirovun Prezident İlham Əliyevin uğurlu dəhliz strategiyasına həsr etdiyi kitabının təqdimatının UNEC-də keçirilməsindən məmnunluğunu ifadə edib. Ş.Əsgərov kitabın əhatə etdiyi mövzunun aktuallığı və əhəmiyyəti barədə fikirlərini iştirakçılarla bölüşərək, müəllifə uğurlar arzulayıb.
KOBİA-nın departament rəhbərinin müavini, UNEC-in müəllimi Eldəniz Əmirov 2 ildən çox müddətə ərsəyə gəlmiş “Avrasiyanın Arteriyaları” adlı kitabı barədə məlumat verib: “Kitab Azərbaycanla yanaşı, ABŞ-ın, Çinin, Rusiyanın və digər dünya nəhənglərinin üzərində mübarizə apardığı Avrasiyanın 30-dan çox nəqliyyat-kommunikasiya və enerji dəhlizləri haqqındadır. Burada həmin dəhlizlərin yaranma tarixi, əhatə coğrafiyası, texniki-iqtisadi göstəriciləri, iştirakçı ölkələr və bu ölkələrin toqquşan maraqları, hər dəhliz komponenti uğrunda gedən müharibələr və perspektivlərinə dair geniş təhlillər verilib”.
Müəllif qeyd edib ki, kitabda Prezident İlham Əliyevin təşəbbüsü ilə yaradılan 10-a yaxın nəqliyyat-kommunikasiya və enerji dəhlizlərinin hər birinin ayrı-ayrılıqda qlobal geosiyasətin əsas komponentinə necə çevrildiyinin detalları hərtərəfli təhlil edilib.
Sonra Bərpa Olunan Enerji Mənbələri Dövlət Agentliyinin direktoru Cavid Abdullayev, Paşa Holdinqin idarə rəisi Fuad İbrahimov, millət vəkilləri Jalə Əhmədova, Aydın Hüseynov, energetika nazirinin müşaviri Zəminə Əliyeva çıxış edərək, ölkə rəhbərinin dəhliz strategiyasının bütün komponentlərini əhatə edən kitabın əhəmiyyətindən danışıblar. Avrasiya materikinin 30-dan çox nəqliyyat-kommunikasiya və enerji dəhlizlərinin hər birinin tarixi, marşrutları, texniki-iqtisadi parametrləri və onların gələcəyinə dair geniş təhlillərin kitabda öz əksini tapdığını bildiriblər. Çıxış edənlər kitabın region ölkələri və Avropada böyük maraqla qarşılanacağını qeyd ediblər.
UNEC-də “Avrasiyanın Arteriyaları” adlı kitabının təqdimatı keçirilib