Oktyabrın 19-dan Azərbaycan Dövlət İqtisad Universitetində (UNEC) birinci kollokviumun keçirilməsinə başlanılıb. Kollokviumda 2015/2016 tədris ili üçün əyani şöbə I-IV kurslarda təhsil alan tələbələr iştirak edəcək.
Universitetdə ilk dəfə olaraq kollokviumlar yeni elektron platforma vasitəsilə həyata keçirilir. Yeniliyin tətbiqində məqsəd tələbə biliyinin qiymətləndirilməsində obyektivliyin və şəffaflığın təmin edilməsidir. Tələbələrin yeni sistemdən səlis yararlanması üçün rəsmi sayt və sosial şəbəkələrdə istifadə təlimatı barədə məlumatlar yerləşdirilib. Məlumatlandırılma və kömək məqsədilə TKQİM və Tyutor xidmətinin əməkdaşları imtahan zallarında tələbələrə lazımi dəstəyi göstərəcəkdir.
UNEC-də kollokvium noyabrın 3-ə qədər davam edəcək. Proses ictimaiyyətə tam açıqdır. Valideynlər və KİV nümayəndələri müşahidəçi qismində iştirak etmək üçün universitetə dəvət olunur.