UNEC nəzdində İqtisadi Araşdırmalar Elmi-Tədqiqat İnstitutunda (İAETİ) Azərbaycan Respublikasının Mərkəzi Bankı, Azərbaycan Prezidentinin yanında Elmin İnkişaf Fondu və Almaniya Beynəlxalq Əməkdaşlıq üzrə Əmanət Kassaları Fondunun “Gənc alimlər və maliyyə savadlılığı” birgə müsabiqəsi çərçivəsində elmi seminar keçirilib.
Seminarda İAETİ-nin böyük elmi işçisi Salman Nəcəfov “Azərbaycanda firmaların borc problemləri: mövcud vəziyyət və borc yükünün azaldılması yolları” mövzusunda təqdimatla çıxış edib. S.Nəcəfov məruzəsində ölkə və dünya iqtisadiyyatında firmaların üzləşdiyi borc problemləri haqqında danışaraq, qeyd edib ki, firmaların borc yükünün yüksək olması Mərkəzi Bankların tənzimlənmə funksiyasını məhdudlaşdırır. O, monetar siyasətin səmərəliliyini firmaların borc yükünün azaldılması vasitəsilə artırmaq mümkün olduğunu da diqqətə çatdırıb. Seminarda firmaların borc yükünün azaldılması yolları göstərilib və firmaların maliyyələşməsində qeyri-borc maliyyə alətlərinin (səhmlər, vəkalət hesabları, layihə maliyyələşdirilməsi) rolunun artırılmasının zəruriliyi vurgulanıb.
Seminarda iştirakçıları maraqlandıran suallar cavablandırılıb.