UNEC-də “İnsan alveri və əməyin istismarına qarşı mübarizə” mövzusunda maarifləndirici seminar keçirilib.

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası və Narkotiklərə Qarşı Təbliğat İctimai Birliyinin təşkil etdiyi keçirilən seminarda UNEC-in İnzibati və təşkilati məsələlər üzrə prorektoru, dosent Şaiq Əsgərov tədbirin əhəmiyyətindən bəhs edərək, insan alveri və əməyin istismarı ilə bağlı mübarizəyə dair gənclərin maarifləndirilməsinin vacibliyini vurğulayıb. Dövlətin bu mübarizəyə böyük diqqət və marağını ifadə edən prorektor, vətəndaş cəmiyyətinin də proseslərə fəal cəlb olunmasının əhəmiyyətindən danışıb.

Narkotiklərə Qarşı Milli Təbliğat Ofisinin sədr müavini Leyla Yolçiyeva gənclərin hüquqlarının müdafiəsi, insan alveri və onunla mübarizə sahəsində mövcud vəziyyət və mübarizə üsullarından söz açıb. O, Tələbələrə insan alverinə qarşı mübarizə tədbirləri, onun profilaktikası, alver qurbanlarının müdafiəsi və onlara kömək göstərilməsinin hüquqi və təşkilati əsasları ilə əlaqədar maarifləndirici informasiya çatdırıb.

Seminarda mövzu ətrafında müzakirələr aparılıb və tələbələrə maarifləndirici çap materialları təqdim edilib