UNEC-də Yeni Azərbaycan Partiyasının yaranmasının 23-cü ildönümü qeyd edilib
Noyabrın 19-da Azərbaycan Dövlət İqtisad Universitetində (UNEC) Yeni Azərbaycan Partiyasının (YAP) yaranmasının 23-cü ildönümünə həsr olunan tədbir keçirilib.
Tədbirdə çıxış edən YAP Səbail rayon təşkilatı Qadınlar Şurasının və UNEC Qadınlar Şurasının sədri Təranə Kərimova tədbir iştirakçılarını bayram münasibətilə təbrik edib, yaradılmasının 23-cü illiyini qeyd edən Yeni Azərbaycan Partiyasının milli dövlətçilik ənənələrinin formalaşmasında həlledici rol oynadığını bildirib. T.Kərimova Ümummili Lider Heydər Əliyevin ideyalarının getdikcə daha geniş təşəkkül tapdığı Azərbaycanın dünya miqyasında öz sözü və yeri olan bir ölkəyə çevrildiyini və xalqımızın xoşbəxt gələcəyinin təminatına güclü zəmin yaradıldığını qeyd edib. Bilidirib ki, cənab Prezident İlham Əliyevin rəhbərlik etdiyi YAP-nın siyasi kursunun alternativi yoxdur. Müasir Azərbaycanın inkişafının əsas dəstəkçisinə çevrilən YAP-ın yaranması insanların gələcəyə olan ümidinin möhkəmlənməsinə yol açıb. Hazırda partiyanın sıralarında 700 minə yaxın üzv birləşib.
Sosial sferanın iqtisadiyyatı və idarə edilməsi kafedrasının müdiri, professor Əli Əlirzayev tədbir iştirakçılarına YAP-ın yaranma tarixindən danışıb. Azərbaycanın çətin dönəmlərində ölkənin gələcəyini düşünərək 91 ziyalı ilə birlikdə Ümumilli Liderə müraciət etdiyini və bundan sonra Naxçıvanda 550 nəfər nümayəndənin iştirakı ilə Yeni Azərbaycan Partiyasının təsis konfransının keçirildiyini söyləyib. Ə.Əlirzayev 1990-cı ilin əvvəllərində ölkəni idarə edən şəxslərin yarıtmaz fəaliyyətinin xalqın səbrini tükətdiyini və Ulu Öndər Heydər Əliyevin 1993-cü ildə xaqlın təkidli tələbi ilə hakimiyyətə gəlməsinin Azərbaycan tarixində mühüm tarixi hadisə olduğunu qeyd edib.
Beynəlxalq ticarət və gömrük işi kafedrasının müdiri, professor Arif Şəkərəliyev Yeni Azərbayan Partiyasının ölkənin müasir siyasi tarixində mühüm rolundan danışıb. Azərbaycanın dünya ölkələri arasında öz iqtisadi qüdrətinə görə önəmli yer tutan bir ölkəyə çevrildiyini bildirib, cənab Prezident İlham Əliyevin həyata keçirdiyi düzgün iqtisadi və sosial siyasət nəticəsində nəinki regionda, eyni zamanda Avropa miqyasında inkişaf edən bir dövlət olduğunu vurğulayıb.
Tədbirdə çıxış edən professor-müəllim heyəti YAP-ın keçdiyi 23 illik şərəfli yoldan danışıb, əldə olunan uğurlardan bəhs edib.