UNEC ilə Bank Respublika arasında anlaşma memorandumu imzalanıb
UNEC ilə Bank Respublika arasında əməkdaşlıq haqqında anlaşma memorandumu imzalanıb.
UNEC rektoru, professor Ədalət Muradov və Bank Respublikanın İdarə heyətinin sədri Tariyel İsmayılovun imzaladığı memorandumda bankın nümayəndələri və universitetin struktur rəhbərləri iştirak ediblər.
Memorandumda UNEC ilə Respublika Bank arasında müasir təhsil proqramları sahəsində əməkdaşlıq, təhsil və bank sahəsində innovasiya fəaliyyətinin birgə həyata keçirilməsi, biznes proseslərində təhsil və informasiya texnologiyalarının tətbiqi, birgə seminar, treninq, konfrans və digər tədbirlərin təşkili, bankda tələbələr üçün staj keçirilməsi, sosial layihələrin işlənməsi və s. nəzərdə tutulur.
İmzalanma mərasimində çıxış edən rektor Ədalət Muradov UNEC-də həyata keçirilən yeniliklərdən söz açıb və universitetin hədəfləri barədə məlumat verib. Bank Respublika ilə əməkdaşlığın genişləndirilməsindən məmnunluğunu ifadə edən rektor, gənc müəllimlərin xarici universitetlərdə tədqiqat aparması, eləcə də xaricdə fəaliyyət göstərən müəllimlərin UNEC-də tədrisə cəlb olunması istiqamətində tərəfdaşlığın vacibliyini bildirib.
Bank Respublikanın İdarə heyətinin sədri Tariyel İsmayılov UNEC ilə əməkdaşlığın perspektivlərindən söhbət açıb. Bank Respublikanın gənclərin peşəkar mütəxəssis kimi yetişməsinə dəstək olacağını deyib. Eləcə də bankın əməkdaşlarının UNEC-in korporativ təhsil imkanlarından yararlana biləcəyinin hər iki tərəf üçün faydalı olacağını vurğulayıb.
*
https://news.unec.edu.az/xeber/125-universitet/7901-bold-red-unec-ile-bank-respublika-arasinda-anlashma-memorandumu-imzalanib-bold-red